Read Makassar Version – KITTA' MATANGKASA AYUB 11 Bible Online

AYUB 11 - Makassar Version – KITTA' MATANGKASA bible

AYUB 11

¹Nakanamo Zofar, “Tenaka nanipiali anjo bicara kosonga? Appaka musti nipattojengi anjo tau jaia je'ne' bawana?

³Ayub, nukanaka takkulleai ikambe ampialiko? Nukapangi angkana lammakkangi ikambe lanri pacau-caunu?

⁴Turu' ri panggappanu, tena nasala anjo kana-kanannu; turu' ri pikkirannu, tangkasakko ri dallekanNa Allata'ala.

⁵Mingka, dasi-dasi naKalenNa Allata'ala a'bicara!

⁶Siagang dasi-dasi nanipauangko ri Ia, angkanaya anjo kacara'dekanga jai lampa-lampana, siagang takkulleai napahang rupataua. Mingka angngu'rangiko angkana tena nasiapa pa'risi'nu, punna nipasitimbangi hukkungang siratanga nutarima.

⁷Masakang akkullei nuselangngi bone mailalanNa Allata'ala? Masakang akkulleko ampahangi koasaNa?

⁸KoasaNa la'bi tinggi na langika; takkulleai nurapi' siagang nukayao. KoasaNa la'bi lantangi na linona tau matea, takkulleai nupahang ngaseng.

⁹KoasaNa Allata'ala la'bi luaraki na linoa, la'bi la'baki na tamparang lompoa.

¹⁰Punna Najakkalakko siagang Naerangko mange ri pangadelanNa, inai maka labarani anrompai eroka Nagaukang?

¹¹Naassengi Allata'ala tau nangaia a'balle-balle; kaja'dallanna ke'nanga tena natassala ri matanNa.

¹²Punna anrong keledai liara' allassukang keledai annaba, nampami akkulle tau toloa a'jari cara'de'.

¹³Ayub, tangkasi pa'mai'nu, nampa assesse' lalang! Appala' doangko mae ri Allata'ala!

¹⁴Pelaki dosaya battu lalang ri atinnu siagang pakabellai kaja'dallanga battu ri balla'nu!

¹⁵Nanukkulle andallekangi tallasaka siagang sa'bara' na barani; lammenteng kassakko siagang tena nuparallu lussa',

¹⁶ba'lalo pa'risi'nu tenamo nanuu'rangi; sanrapang a'ba naungamo, nikaluppaimi ri taua.

¹⁷Lasingarangngammi tallasa'nu na singara'na alloa, na wattu-wattu sassanga lalang tallasa'nu lasingara' kammami singara' bari'basaka.

¹⁸Lamajarrekko siagang jai panrannuannu; laNajagaiko Allata'ala sa'gennu amang.

¹⁹Tena nulamalla' mae ri musua; jai tau lappala' tulung mae ri kau.

²⁰Mingka tau ja'dalaka lalingui paccini'na, saba' tena pannulunna ke'nanga. Se'reji bawang panrannuanna ke'nanga iamintu a'jala'na labattu linta'.”