Read Makassar Version – KITTA' MATANGKASA AYUB 12 Bible Online

AYUB 12 - Makassar Version – KITTA' MATANGKASA bible

AYUB 12

¹Appialimi Ayub angkana, “Memang, ikau ngasemminne wakkele'na rupataua. Punna mate mako, lamate tommi kacara'dekanga.

³Inakke tau nia' tonja akkala' bajikku; sikontu nupaua ngaseng anjo kupahang tommi. Nampa pole, inai tau angngasseng ngasengi anjo sikammaya? Jari, teako nanukana ngaseng la'biangngang mako na inakke!

⁴Nikakkalia' ri agangku siagang belaku, nampa inakke anne annaba' siagang tena callaku. Riolo Napiali Allata'ala pappala' doangku punna akkioka' appala' bantuang.

⁵Nupakkanaia' tu cilaka, nampa amang ikau tallasa'nu; tau a'biringa tu'guru' nualle nutunrung ngaseng ba'lalo.

⁶Mingka katallassanna paellaka tena niancangi; tau barania ambaliangi Allata'ala, amangi tallasa'na. Na rewataja a'jari panrannuanna ke'nanga, kagassingang kalennaji bawang napattoang.

⁷Akkuta'nangko mae ri jangang-jangang siagang olo'-olo' maraengannaya na nasareko ke'nanga pangngajarang.

⁸Appalakko kasingarang mae ri apa attallasaka ri butta siagang ri tamparang, na nasareko ke'nanga kasingarang.

⁹Inai ri yangasenna anjo ke'nanga tangngassengai, angkana mappa'jarina ke'nanga iamintu KalenNa Allata'ala?

¹⁰Ia angngatoroki tallasa'na sikontu niaka attallasa'; Ia Makoasa mae ri nyawana tunggala' rupataua.

¹¹Sangkamma lilaku nangai nakasia' kanre nyamanga, kammaminjo tolingku nangai mappilangngeria kana-kana.

¹²Turu' kabara', kacara'dekanga niaki ri tau toaya umuru'na, mingka kacara'dekang siagang kagassingang ri Allata'ala bawang nia'. Nakana taua, pammahanga niaki ri allaloamo umuru'na, mingka pammahang siagang kakoasang ri Allata'alaji bawang nia'!

¹⁴Apa le'baka Narumbang takkulleai nibangung poleang inai Natahang takkulleai bebasa' ammotere'.

¹⁵Natahangi je'neka, nakalotoro' siagang roso' sikamma niaka; Nalappassangi assolong, nabattumo a'baya!

¹⁶Anjo Allata'ala gassingi, kassaki siagang porei! Lapung patipu siagang nitipua nia' ngasengi ri kakoasanNa.

¹⁷Nabi'buki kacara'dekanga battu ri sikamma koasaya ri pamarentahang, na sikamma pamimpinga Napa'jari tunikakkali.

¹⁸Naruntungi karaenga nampa Natahang ke'nanga;

¹⁹Napakatunai imang-imanga siagang sikamma pamimpinga.

²⁰Natongkoki bawana tau cara'deka a'bicara, Nabi'buki kacara'dekanna sikamma tau toaya.

²¹Napakasiriki tau nipakalompoa; Naallei kakoasanna tau koasaya.

²²Nasingari tampa'-tampa' anremenga; Nasiori bayang-bayang le'leng pakkaka.

²³Na'jari bansa-bansaya a'bakka' siagang kala'biang, nampa Napanraki ke'nanga sa'genna ancuru'.

²⁴Napa'lingui sikamma pamimpinga, sa'genna piti lampa-lampai tanaassengai lanatujua ke'nanga.

²⁵Angngosalaki ke'nanga lalang ri sassanga, ta'royong-royong sanrapang tau nasa'ring.”