Read Makassar Version – KITTA' MATANGKASA AYUB 13 Bible Online

AYUB 13 - Makassar Version – KITTA' MATANGKASA bible

AYUB 13

¹“Yangasenna anjo le'baki kulangngere' siagang kucini' kalengku, siagang kupahang tojeng-tojeng.

²Apa nuassenga, kuasseng tonji; gassingka nukana nubeta'.

³Mingka erokka' a'bicara siagang Kaminang Koasaya; erokka' ampattojengi parkaraku ri dallekanNa Allata'ala.

⁴Saba' nutongko' ngasengi katoloannu siagang balle-balle, tena sisalana sanro paballe-ballea.

⁵Ebara' angkana tena ngasenja nu'bicara, akkulle nikanajako tau cara'de'.

⁶Jari pilangngerimi pappialingku; parhatikangi kana mappatojengku.

⁷Akkullekai lanri Allata'ala, nu'balle-balle? Akkullekoka a'balle-balle untu' kaparalluanNa?

⁸Akkullekoka agang mae ri Allata'ala nanualle-alleang salaku tumappatojenna?

⁹Punna Naparessako Allata'ala, maka labajiki kajarianna? Maka akkulleko antipui sangkamma nutipuna rupataua?

¹⁰Punna nia' nualleangang, manna nucokko-cokko, lanihukkung terasakko ri Allata'ala.

¹¹Apaka tena nata'bangka nyawanu ri kalompoanNa Allata'ala? Apaka tena napakamallaki nyawanu ri kahebakkanNa?

¹²Sikontu pappasailenu sanrapangi limbu'bu' tenaya matu-matunna; alasannu sanrapangi butta pi' gampanga atte'ngere'.

¹³Lanri kammana anjo, a'mereki mako, boli'mi kamma nainakke a'bicara! Takujampangiai manna pole apa kale'bakkanna!

¹⁴Sadiama' ansaungi nyawaku!

¹⁵Tena kujampangi lanri tappu' minasama'! Punna ero' Allata'ala ambunoa', kupassareang mami kalengku, mingka kupattojengi panggaukangku ri dallekanNa.

¹⁶Gassingka lanri anjo kabaraniangku nakusalama', saba' tau ja'dalaka tena nabarani andallekang ri Allata'ala!

¹⁷Kamma-kamma anne pilangngeri baji'-baji' kanangku; parhatikangi apa kupakasingaraka.

¹⁸Sadiama' ampamajui parkaraku; tappaka', angkana tena kukkulle nisalakang!

¹⁹O, Batara, punna battuKi' siagang Kitudua', la'merekia' siagang kutayangi a'jalakku.

²⁰Mingka Kiturukianga' anne rua pappalakku, sollangku barani pole andallekang ri Katte:

²¹ammari maKi' ansessa', siagang teaKi' pitujuia' kahebakkanTa!

²²A'bicara maKi', nakuppiali. Yareka boli'ma' kamma a'bicara, naKibalasakka' a'bicara!

²³Siapa jaina sala siagang dosa le'ba' kugaukang? Kipau laloi sikamma gau' sala le'baka kugaukang!

²⁴Angngapa Ki'lili siagang bella battu ri nakke? Apa saba'na naKipa'jari musua'?

²⁵Inakke poro leko' kayu runanja' niiri' ri anging numalo, angngapa naKipannekkere' kamma'! Inakke poro rarame kalotoro' siagang kalumenja' bawang, angngapa nakkulle Kiondang kamma dudua'!

²⁶Kipattantu a'jari paiki sarengku; Kibalasaki kasalang ri wattu rungkaku.

²⁷ Kisikkoki rante bassi bangkengku; sikontu gio'-giokku Kijannangngi. Ba'lalo manna pala' bangkengku tena todong nata'lappasa' ri paccinitTa.

²⁸Jari a'jari lamma sikalima' sanrapang kayu jappo'; sanrapang kaeng nikanre ri alitana, a'jari jappo'ma'.