Read Makassar Version – KITTA' MATANGKASA AYUB 15 Bible Online

AYUB 15 - Makassar Version – KITTA' MATANGKASA bible

AYUB 15

¹Appialimi Elifas angkana, “Bicara kosong, Ayub, tena tojeng bua'-bua'na bicarannu. Tena tau cara'de' appiali kamma ikau anne, talanapattojengai kalenna ri kana-kana tenaya battuanna.

⁴Ebara' nituruki anjo bicarannu, manna sitau tenamo lamalla' yareka appala' doang ri Allata'ala.

⁵Kana-kanannu ampa'nyatai angkana salako, mingka nutongkoki kaja'dallannu siagang kaporeannu a'bicara.

⁶Tena kuparallu antuduko siagang ansalakangko, saba' lanri kana-kanannu tonji nanituntukko.

⁷Nukapangi angkana ikau tau uru-uru nilassukang? Apaka haderekko ri wattunna nipa'jari sikamma monconga?

⁸Apaka nulangngereki Allata'ala ampareki rancanaNa? Apaka ikauji bawang ampatangi kacara'dekang rupataua?

⁹Sikontu apa nuassenga, naasseng ngaseng tonji ikambe; sikontu nupahanga, napahang ngaseng tonji ikambe.

¹⁰Anne kacara'dekanga natarimai ikambe battu ri tau uwanga uu'na; nia' memammi ke'nanga ri tenanapa nilassukangi manggenu!

¹¹Angngapa nakuttu nyawanu antarimai panynyaleori battua ri Allata'ala? A'bicarai ikambe siagang sa'bara' na lamma lalang arenNa.

¹²Mingka a'jari naiki larronu, a'rinra-rinrai matannu;

¹³larroko mae ri Allata'ala siagang nubali-bali.

¹⁴ Maka akkullei rupataua tena sikali salana? Akkullekai nipannaba ri dallekanNa Allata'ala?

¹⁵Ba'lalo manna mae ri malaekaka tena todong Natappa' Allata'ala; tena natangkasa' ke'nanga ri paccini'Na.

¹⁶Sarroangampa rupatau panraka siagang ra'masaka, angnginunga kaja'dallang sanrapang angnginung je'ne'.

¹⁷Pilangngeri Ayub, nia' lakupisingariangko,

¹⁸napangngajarranga tau cara'deka mae ri nakke. Anjo pangngajaranga natarimai battu ri boe-boena, nampa langka' napatulusu' mae ri turunganna.

¹⁹Anjo wattua tena bansa maraeng ri pa'rasanganna ke'nanga; tena tau lampa'lingui ke'nanga battu ri Allata'ala.

²⁰Tau ja'dala' anjallakkangai paranna tau, lalussaki lalang sikontu tallasa'na.

²¹Sa'ra-sa'ra hebaka lanreppeki tolinna; ri wattu amanga battui paellaka ambakkai.

²²Tena panrannuanna lakkulle alliliangi sassanga, saba' niondangi ri pa'danna pabunoa tunggala' kasampatang.

²³Attayangi balangkoaka ri wattu kamateanna eroki ke'nanga angkanrei maya'na. Jari angngu'rangimi angkana sassangi allo lanadallekanga.

²⁴Balaya rapangi karaeng porea, sadiami ero' ambakkai.

²⁵Kammaminjo sarenna tau ambaliai Allata'ala, siagang barania angngewai Kaminang Koasaya.

²⁶Tampoi ambakkai siagang angngewai Allata'ala; naangkaki pa'lapa' barambanna, tena sikali naero' nibeta.

²⁸Ammantangi ri kota-kota ancuruka, ri balla'-balla' tenaya taunna. Anjo kota-kotaya le'ba' nipattantumi untu' nipa'jari rumbangngang.

²⁹Latappela'mi kakalumanynyanganna anjo taua natenamo bate-batena; la'busu' taba sikali barang-baranna.

³⁰Tena nalakkulle ta'lappasa' battu ri sassang makkapuka; pepeka lampa'jari ammutungi cu'la'-cu'la'na. Lacappuki nitui' ri bawaNa Allata'ala.

³¹Punna tappaki mae ri apa tenaya matu-matunna, lanitipumi; na sambe lanatarimaya, tena todong matu-matunna.

³²Tenapa narapiki wattunna, nalamatemo, sanrapangi tangke kayu tenayamo nakkulle lamoncongbulo poleang.

³³Rapang poko' anggoro' lelasa' runang rapponna, rapang poko' zaitun runtung bungana.

³⁴Tau ja'dalaka latena turunganna; la'busu' akkanre balla' nabangunga battu ri wassele' doe' pammuccu'.

³⁵Iaminjo ke'nanga anrancanga siagang anggaukangai ja'dalaka; balle-ballea tuli niaki lalang atinna.”