Read Makassar Version – KITTA' MATANGKASA AYUB 17 Bible Online

AYUB 17 - Makassar Version – KITTA' MATANGKASA bible

AYUB 17

¹A'reppese'mi a'jalakku, birimmi tappu' napasakku; jerakku mami ammantang.

²Napa'jaria' taua pare' tunicau-cau; tamaka batena ke'nanga ampianderia'.

³Inakke tau lambusu', o Allata'ala. Kipatappaka'! Inai mami akkulle ampattojengi kana-kanangku?

⁴Kitongkoki pikkiranna ke'nanga sa'genna tena napahangi; gassingka napadundua' ke'nanga.

⁵Nakana paruntu' kanaya, inai antuntuki aganna lanri untu' passawallang, kalenna ana'-ana'na lannarima pa'balasa'.

⁶Anne kamma nipianderima' siagang anjo paruntu' kanaya; battui ke'nanga ampi'rui rupangku.

⁷Tabajikami paccinikku lanri susaku; roso' ta'ronammi sikontu tubuku.

⁸Tau bajika, ta'bangkai na lannasa'; tau tenaya salana, nakapangi tena Bataraku.

⁹Tau bajika siagang tau tenaya salana, pila' tappa'mi angkana ningai ri Allata'ala batena attallasa' ke'nanga.

¹⁰Mingka ebara' angkana battu ngasengko mae anrinni, manna se're tania' tu cara'de' lakugappa.

¹¹Allalomi allo-allo tallasakku, salasami sikontu rancanaku; tappela' tommi sikontu naminasaya atingku.

¹²Mingka nakana ngaseng sahabakku, ‘Bangngia anjo allo, na'birimmo singaraka battu.’ Mingka kuassengi lalang ri pa'maikku angkana tuli sassanna tallasakku.

¹³Lino kamateang bawang kuminasai, anjoremma' lattinro lalang ri sassang.

¹⁴Jerakku kuarengi ‘Manggeku’, na gallang-gallang angkanreai tubuku kusa'buki ‘Ammakku’ siagang ‘Sari'battang baineku.’

¹⁵Kemae minasangku; inai anciniki nia' mate'neku

¹⁶Punna kunaung ri linona tau matea, tenamo pa'minasangku.”