Read Makassar Version – KITTA' MATANGKASA AYUB 19 Bible Online

AYUB 19 - Makassar Version – KITTA' MATANGKASA bible

AYUB 19

¹Mingka appialimi Ayub, angkana, “Angngapa nainakke tulusu' nucalla ngaseng, siagang nupa'risi lalang kana-kana?

³Nupa'mole-moleia' nuhina, siagang nusessa' tena siri'nu.

⁴Ebara' angkana sala panggaukangku, tena olona ikau ngaseng lanapakarugi.

⁵Nukanaka la'bi bajikangngangko na inakke? Susaku nukana a'jari butti ri kasalangku.

⁶Assengi angkanaya inakke Nasessa' Allata'ala, siagang Najakkalaka' lalang ri sikko'Na.

⁷A'jalloka' lanri anjo kapallakkang kammaya, mingka tena manna sitau amparhatikanga'. Akkioka' angkana, ‘Kemae kaadelanga’, mingka tena tau allangngereki sa'rangku.

⁸Natongkoki Allata'ala oloangku, takkullea' allalo, lorong-lorong kuoloa Napa'jari sassang pakka'.

⁹Narampasaki sikontu barang-barangku, Napanraki areng bajikku.

¹⁰Nalappassangngia' battu ri kere-keremae, sanrapang tau ambi'bu aka' lamung-lamung, nampa Nabolikka' ta'ronang na kalumeng, kammaminjo bateku Naalleang sikontu panrannuangku.

¹¹A'rinra-rinrai larroNa Allata'ala mae ri nakke; Napa'jaria' sangkamma musunNa.

¹²Battui pasukanNa ambakkaia', takkulleai nitahang; narompai oloangku, natammulili kemaku.

¹³Napakabellai battu ri nakke bija pammanakangku; a'jari tau maraenga' mae ri sikamma passiassengangku.

¹⁴Napakabella ngasengi kalenna bija-bijangku siagang bela-belaku; agang-agangku takkaluppa ngasemmi ri nakke.

¹⁵Ata bainea nakaluppaima', karaenna ke'nanga; napasangkamma' tau tenaya naassengi ke'nanga.

¹⁶Kukioki atangku, mingka tappialiai ri nakke, manna kunyonyo' siagang kana-kana baji'.

¹⁷Turiballakku eroki ta'langnge angngaraki rasanna napasakku, sari'battang tangkakku taerokai a'reppese' ri nakke.

¹⁸Nihina' ri ana'-anaka ri aganga; punna ammentenga', nakakkalia' ke'nanga.

¹⁹Punna nacinikka', sanna' malla'na bela bajikku; nibokoia' ri sikamma tu kukamaseanga.

²⁰Kalengku bukkuleng mami anrokoki buku-bukungku; sike'de' mami kumate siagang allayang nyawaku.

²¹He agang-agangku, kamaseang laloa', saba' nitunrunga' ri limanNa Allata'ala.

²²Tulusu' nijallakkangku ri Allata'ala, angngapa numminawang turu' ri Ia anjallakkanga'? Tenapa nasangga pa'mai'nu ansessa'?

²³Oh, nicataki paleng kana-kanangku, sa'genna tuli laniu'rangi;

²⁴nipattoki siagang bassi mae ri batua, sollanna attahang sallo.

²⁵Kuassengi angkana nia' Mappatojengku ri suruga; kale'bakkanna labattui antulunga'.

²⁶Manna bokka'-bokka' siagang reppe'-reppe' bukkulengku, mingka lalang nia'na ija tubuku, laccinika' mae ri Allata'ala.

²⁷Mata kalengku laccini' mae ri Ia, Iami a'jari sahabakku. Ancuruki pa'maikku lanri nukanana ngaseng,

²⁸‘Antekamma bateta lantuntuki?’ A'boyako patteteang untu' appare' kara-kara.

²⁹Mingka kamma-kamma anne, malla' laloko mae ri pa'dang; Saba' larroi Allata'ala na Nahukkung tau dorakaya; jari nuassemmi angkanaya Allata'ala angngadeli rupataua.”