Read Makassar Version – KITTA' MATANGKASA AYUB 20 Bible Online

AYUB 20 - Makassar Version – KITTA' MATANGKASA bible

AYUB 20

¹Appialimi Zofar angkana, “He Ayub, kasi'rikanga' napakamma kanannu, kamma-kamma anne erokka' ampialiko linta'.

³Anjo kana-kanannu anghina sikali, mingka kuassengi apa pialinna.

⁴Tenaka nuassengi angkana battu ri jammang riolo dudu, ri wattu appakaramulana niboli' rupataua ri lino,

⁵karannuanna tau ja'dalaka poro sinampe'ji bawang, siagang kasannanganna tau dorakaya sipakkida mataji?

⁶Manna pole narapi' langika kalompoanna, sa'genna nabuttu' ulunna rammanga,

⁷mingka lalanynya' tonji satunggu-tungguna, lanynya' battu ri linoa, nahina sikali carana lanynya'. Sikamma tau le'baka angngassengi, lakkuta'nangi angkana, ‘He, kemae lampana?’

⁸Lalanynyaki sanrapang bayang-bayanna so'naya, lanynya' sanrapang paccini' ri wattu bangngia.

⁹Tenamo niciniki ri mata; tenami ri tampa' pammantanganna.

¹⁰Apa nalukkaka riolo battu ri tau tenaya apa-apanna, musti nisambei ri ana'-ana'na.

¹¹Manna narungka siagang pore, mingka poro sinampe'ji na'jari limbu'bu' bawang.

¹²Tamaka te'nena kaja'dallanga lalang ri bawana! Kamma nipassayangi lania'lu'; Lanri kammana anjo naboliki rawanganna lilana, sollanna sallo nakasia' nyamanna.

¹⁴Mingka anjo kanrea tappinrai lalang ri battang, a'jari racung pai' angngerang kamateang.

¹⁵Barang-barang nilukka' naa'luka, tarpassa nalangngeangi; Napasuluki Allata'ala battu lalang ri battanna.

¹⁶Tau ja'dalaka langnginungi racung paerang bala, lamatei lanrinna, sanrapang tunikokko' ri ulara' a'racung.

¹⁷Talanakasiakkami minynya' zaitun alla'bia, yareka dadi' siagang bani tattumpa-tumpaya napakamma jai.

¹⁸Sikontu passawalanna musti napoterangi; talanakasiakkai wassele' usahana.

¹⁹Saba' najallakkangi siagang napakkasi-asi tau tenaya apa-apanna; narampasaki balla' tenaya nabangungi.

²⁰Lanri angngoana na tenamo passanggana, natenamo sukku'na pakkasia'na.

²¹Punna angnganrei napa'la'busu' ngasengi sikamma niaka lanri kammana anjo tenamo nattahang kala'bianna.

²²Ri wattu sangganamo kala'bianna, battumi pa'risika siagang susaya antujui.

²³Ri wattu sibu'na ambonei battanna, sanna'mi larroNa Allata'ala nampa nihukkung.

²⁴Punna lari alliliangi pa'dang bajaya, lanibokkaki ri pana tambaga.

²⁵Nitabai ri pana sa'genna loko'; cappa' pana accilla' antarrusuki kalenna, nanikalimbu'mo ri malla' pa'mai'na.

²⁶Ancuru'mi sikontu barang boli'-boli'na: ia siagang sikontu kaluargana nikanre ri pepe' taniparinraya ri rupatau.

²⁷Nisungkei ri langi' kaja'dallanna; ambangungi buttaya ambaliangi.

²⁸Sikontu kakalumanynyangnganna lacappuki, lanri allumpana larroNa Allata'ala.

²⁹Iaminjo sarenna tau kodi sipaka, sare Napattantua Allata'ala mae ri ia.”