Read Makassar Version – KITTA' MATANGKASA AYUB 21 Bible Online

AYUB 21 - Makassar Version – KITTA' MATANGKASA bible

AYUB 21

¹Appialimi Ayub angkana, “Pilangngeri anne apa lakupaua; se'reji bawang kupala' a'jari panynyaleori.

³Sarea' kasampatang, na nakke tosseng a'bicara, le'baki anjo akkulle mako anghina' pole!

⁴Teai rupataua kuagang a'gea', jari tena nangngapa punna kurang sa'baraka'.

⁵Cinikima', nunampa lalannasa' ngaseng, takkajannakko siagang tattongkoki bawanu.

⁶Punna kunawa-nawa anne tallasakku annekkere'ma' lanri malla' duduku.

⁷Angngapa natau ja'dalaka Nasare umuru' la'bu Allata'ala, siagang tulusu' katambang barang-baranna ke'nanga?

⁸Ganna' sallona tallasa'na ke'nanga sa'genna nacini' ana' cucunna ke'nanga a'jari lompo.

⁹Amang sannang ruma tanggana ke'nanga; Tena Napitujui bala ke'nanga.

¹⁰A'bija-bijai olo'-olo' piarana ke'nanga, tena susana punna ammana'-mana'.

¹¹A'lumpa'-lumpa' rannu ana'-ana'na tau ja'dalaka, rapang gimbala' rungka a'rannu-rannu.

¹²Nirurungang ri sa'ra rabana, suling, siagang kacapi, suaraki ke'nanga akkelong-kelong siagang a'joge'-joge'.

¹³Napa'la'busuki allo-allo katallassanna ke'nanga lalang mate'ne, na amang nasa'ring ri wattunna mate ke'nanga.

¹⁴Padahala' le'baki angkana ke'nanga ri Allata'ala, ‘BellaKi' anrinni siagang a'lampaKi'! Tanajampangiai ikambe siagang taerokai ikambe ampahangi apa erotTa siagang pattujunTa mae ri tallasa'na ikambe.’

¹⁵Nakana pikkiranna ke'nanga, ‘Tena matu-matunna allayani Allata'ala, siagang tena bua'-bua'na appala' doang mae ri Ia.

¹⁶Sai lanri kagassinganta tonji bawang, nanigappa sikontu erotta siagang pattujunta?’ Mingka tena sikali kusituju ri pikkirang siagang panggappa kammaya anjo.

¹⁷Le'bakkai nibuno kanjolina tau ja'dalaka, siagang nituju ri bala siagang kacilakang? Le'bakkai Allata'ala larro mae ri ke'nanga, sa'genna nihukkung ke'nanga?

¹⁸Le'bakkai ke'nanga rapang rarame siagang limbu'bu' niri'bakang ri anging puttusu' siagang anging allaloa?

¹⁹Nukana ngaseng, ‘Nihukkungi anaka ri Allata'ala lanri dosana manggena.’ Mingka inakke kukana: Tau dorakaya, iatommi nihukkung ri Allata'ala, sollanna sadara' ke'nanga angkana lanri dosana ke'nanga, Nappabattu hukkungang Allata'ala.

²⁰Lappassammi tau dorakaya antanggongi dosa kalenna ke'nanga, lappassammi nakasia' pangngalarroiNa Allata'ala Kaminang Tinggia.

²¹Punna la'busu'mo wattunna taua ri lino, maka najampangi iji angkana mate'nei kaluargana?

²²Maka akkullei rupataua angngajaraki Allata'ala na KalenNa Allata'ala angngadeli apa attallasaka ri suruga?

²³Nia' tau akkamale lalang tallasa'na; sukkuki siagang assaui pa'mai'na ri wattunna mate. Sannangi siagang mate'nei nakasia' ri matena, nagassingija tubuna anjo wattua.

²⁵Mingka nia' todong tau mate sanna' pa'risi'na, tena le'baka nakasia' mate'nea.

²⁶Mingka ri jeraka, para anra'bai ke'nanga; nikatulung ri olo' siagang gallang-gallang.

²⁷Memang, kuassengi apa nupikkirika ngaseng siagang sikontu kaja'dallang nurancanga.

²⁸Akkuta'nangko angkana, ‘Kemae balla'na makoasaya anggaukangai panggaukang dorakaya?’

²⁹Tenapaka nukuta'nangi tau masarroa a'lampa? Tenaka nutappa' ri kabara' napabattua ke'nanga?

³⁰Nakana ke'nanga, ‘Ri allo appabattuNa hukkungang Allata'ala, lanipasalamaki sikamma tau ja'dalaka.’

³¹Tena antuntuki panggaukanna; tena ambalasaki kaja'dallanna.

³²Nierangi mae ri jeraka, nipantamaki ri kali'bong kuburuka; nijagai siagang niparakai jera'na.

³³Assa'bui tau a'jappa anrurungangi maya'na; nampa nitambungi baji'mo ri butta.

³⁴Jari, bicara kosong anjo panynyaleorinnu, sangnging balle-balle pappialinnu!”