Read Makassar Version – KITTA' MATANGKASA AYUB 22 Bible Online

AYUB 22 - Makassar Version – KITTA' MATANGKASA bible

AYUB 22

¹ Nakanamo Elifas, “Ri sikontu umma' rupataua tena manna sitau a'matu-matu mae ri Allata'ala. Tau sannaka baji'na akkala'na, poro mae ri kalenna bawang a'matu-matu.

³Maka nia' matu-matunna mae ri Allata'ala, punna nugaukang ero'Na? Apaka nia' passawalanna mae ri Ia, punna sukku' baji'na tallasa'nu?

⁴Teai lanri malla'nu ri Allata'ala, na nituduko siagang nisalakangko,

⁵passangalinna lanri jai duduna dosanu, siagang tamaka ja'dala'na tindakannu siagang panggaukannu.

⁶Punna takkullea nabayara' inranna sari'battannu, nurampasa' ngasengi pakeanna.

⁷Tau posoa tena nusarei je'ne' inung, tau cipuruka tena nupirarai kanre.

⁸Nupakei jabatannu siagang koasanu untu' angngallei sikamma buttaya.

⁹Teai poro tenana bawang nutulungi sikamma jandaya, mingka ana' kukanga nujallakkang tongi.

¹⁰Lanri kammana minjo narassimo sikko' ri tammulilinu, siagang ti'ring nitongko'mi ri pakkasia' malla' atinnu.

¹¹Pila' sassangi alloa, takkulleako accini'; tallangko nituju ri a'ba sannaka lompona.

¹²Sai langi' tinggia pammantanganNa Allata'ala, na accini' naung, ri sikamma bintoeng tinggi dudua?

¹³Mingka akkuta'nangko angkana, ‘Apa todong Naasseng? Ia niaki irateanna rammanga, takkulleai angngadeliki'.’

¹⁴Nukapangi angkana nitongkoki paccini'Na ri rammang, siagang irateji ri pa'baeng-baenna langika siagang buttaya a'jappa?

¹⁵Maka tuli ero' ijako allalo ri oloang napilea sikamma tau ja'dalaka?

¹⁶Niparuntangi ke'nanga ri tenanapa narapiki wattu kamateanna, na nianyukang ri je'ne' aba' antujuai.

¹⁷Iaminjo ke'nanga barani antollaki Kaminang Koasaya, na nakapang angkana takkulleai a'gau' apa-apa mae ri ke'nanga.

¹⁸Nampa Allata'alaja le'ba' ampa'jari kalumanynyangi ke'nanga! Tena tojeng nakupahangi batena appikkiri' tau salaya pikkiranna!

¹⁹Tau bajika, ammakkala' rannui, punna nacini' tau ja'dalaka anggappa hukkungang.

²⁰Sikamma barang-baranna tau ja'dalaka ancuru' taba sikali, nampa nikanre ri pepe' sa'genna la'busu' apa tassesaya.

²¹Jari, Ayub, assiama' mako siagang Batara, sollanna nunggappa kasannangngang. Punna nugaukang kammaya anjo, mattantu anggappako kaupakkang.

²²Tarimai apa Napangngajarranga Batara mae ri kau; boli' ngasengi anjo lalang ri pa'mai'nu.

²³Pakatunami pa'mai'nu, ammotere' mako mae ri Batara, pammarimi kaja'dallanga ri balla'nu.

²⁴Pela'mi bulaennu kaminang ti'noka; pasambilai antama' ri binanga tenayamo je'ne'na.

²⁵Boli'mi kamma na Kaminang Makoasaya a'jari bulaennu, siagang a'jari pera'nu sannaka lompona anggaranna.

²⁶Jari akkulle mako tuli tappa' mae ri Allata'ala, na nuasseng angkana Iami kabattuanna mate'nenu.

²⁷Punna appala' doangko, laNapialiko, nakkulle nurupai sikontu janjinnu.

²⁸Usahanu tuli langngerangi wassele', siagang singaraka lassingari tallasa'nu.

²⁹Tau borroa nipakatunai ri Batara, mingka tau tuna pa'maika Napasalamaki.

³⁰LaNatulungko Allata'ala punna tena nusala, siagang punna nugaukang ero'Na.”