Read Makassar Version – KITTA' MATANGKASA AYUB 24 Bible Online

AYUB 24 - Makassar Version – KITTA' MATANGKASA bible

AYUB 24

¹“Angngapa nataNapattantua Allata'ala allo pangadelanga, sollanna anggappa kaadelang tau angngassengai?

²Nia' tau appalesso' tanra pa'baeng-baeng, sollanna a'jari luara' tampa'na. A'lukkaki ke'nanga sipa'rappungang gimbala', nampa nabara ri barana ke'nanga.

³Keledaina ana' kukanga, nalariang ke'nanga; sapina jandaya, naalle napa'jari panynyikko' inrang.

⁴Narompai tu kasi-asia anggappai ha'na, jari tarpassa accokkomi tukamase-masea.

⁵Jari tu kasi-asia rapammi keledai liara' a'boyaya kanre ri parang akkatintinga; anjoreng mami ri tampa'-tampa' kammaya anjo nia' kanre untu' ana'-ana'na.

⁶Tarpassa kokonna tumaraenga najama; rappo anggoro' tau ja'dalaka musti napasse're.

⁷Tena kalimbu'na siagang pakeanna untu' pakkammu' tubuna ri wattu bangngi.

⁸Nibasai ri bosi sarroa ri moncong, nampa napadakki' kalenna ri moncong batua untu' a'la'lang.

⁹Tau ja'dalaka napa'jari atai ana' tenaya anrong manggena, na naalle ana' lolona tau kainranganga ri ia.

¹⁰A'lampai tu kasi-asia tamaccare-care; cipuruki ri wattu akkattona gandung ri kokoa.

¹¹Battu ri poko' zaitun appareki minynya' siagang battu ri rappo anggoro' appareki inungang, mingka ia kalenna turere.

¹²Ri kota-kotaya kalangngerang sa'ra kunrarenna tau lamate duduamo, tau lokoka akkio' appala' niballei, mingka taNapilangngeriai pappala' doanna ke'nanga; taerokai anjampangi.

¹³Nia' tau antollaki singaraka siagang namusui, tanaassengai siagang tanaturukiai ke'nanga oloanna.

¹⁴Ambangung subui battu ri tinrona pabuno-bunoa, nampa assulu' ammuno tukamase-mase, siagang ri tenanapa nabari'basa', a'dikki-dikkimi sangkamma palukka'.

¹⁵Pagau' bawanga natayangi battuna sa'ra alloa; nabongongi rupanna sollanna taniassenga ri taua.

¹⁶Palukkaka ammongkaraki balla' ri wattu bangngi; ri wattu allo a'lilimi ri singaraka nampa accokko.

¹⁷Sanna' malla'na ke'nanga mae ri bari'basaka, mingka sassang dudua, nakasannangngi.”

¹⁸Nakanamo Zofar, “Tau ja'dalaka nianyukangi ri je'ne' a'ba, buttana nitunrai ri Allata'ala; koko anggoro'na a'jari sinoi; tenamo tau anjama anjoreng.

¹⁹Rapang je'ne' a'batu lanynya' nitaba ri timoro' siagang allo, kammaminjo tau dorakaya nia'lu' antama' ri linona tau matea.

²⁰Amma' kalenna angkaluppai, na nikanre tubuna ri gallang-gallang. Talaniitungami pole arenna; nipanraki sanrapang poko' tumbang.

²¹Nakajariang ngaseng kammaya anjo lanri najallakkanna jandaya, na'gau' palla' mae ri baine tenaya ana' bura'nena.

²²Mingka lanri koasaNa Allata'ala, Nabongkai tau porea. Angngallei tindakang Allata'ala, na matemo tau dorakaya.

²³Allata'ala assarei tallasa' salewangang, mingka tenammarina Najannangngi.

²⁴Poro sinampe'ji tallasa' mate'ne, mingka ri boko a'lampami untu' satunggu-tungguna. Kalumengi rapang ruku' tenaya matu-matunna; rapang bulere' ase nikere' battu ri batanna.

²⁵Inai akkulle ansassali anjo apa a'nyata kammaya, yareka anggeakki kamma tojenna kana-kanangku?”