Read Makassar Version – KITTA' MATANGKASA AYUB 27 Bible Online

AYUB 27 - Makassar Version – KITTA' MATANGKASA bible

AYUB 27

¹Napannarrusu'mi bicaranna Ayub, angkana, “Lanri arenNa Allata'ala mattallasaka, assarea kaadelang mae ri nakke,

³assumpa' kukana: Lalang Nasareku ija nappasa' Allata'ala, lalang nia'na ija nyawa lalang ri kalengku,

⁴tena nala'bicara balle-balle muncengku, tena nalannipu lilaku.

⁵Jari taeroka' ampaui angkana annabako; sa'gengku pole mate lattahanga' angkana tena kura'masa'.

⁶Tuli anna'galakka' mae ri kamannurukingku, siagang tuli tangkasa'na ati mailalangku.

⁷Dasi-dasi nanihukkung musungku sangkamma tau doraka, na niballassi balingku sangkamma tau kodi sipa'.

⁸Maka nia' panrannuanna tau kumbalaka ri wattunna Natuntu' Allata'ala nyawana?

⁹Maka laNapilangngeri Allata'ala karru'na punna nitujui ri kasukkarrang?

¹⁰Mustina nakkuki ri kassannangang battua ri Allata'ala, siagang tena mangnganna appala' doang mae ri Ia.

¹¹Lakuajari ngasengko ri passala' kalompoang koasaNa Allata'ala, kupauangko rancanaNa Kaminang Koasaya.

¹²Mingka, kalennu ngasemmi le'ba' anciniki. Jari, angngapa nussare pappakainga' tenaya anggaranna?”

¹³Nakanamo Zofar, “Kammaminne bateNa Allata'ala Kaminang Koasaya anghukkungi tau tenaya naadele' siagang tau dorakaya.

¹⁴Punna jai ana'na, lamatei ke'nanga lalang bundu' siagang ana' cucunna lakakurangangi lalang tallasa'na.

¹⁵Bijanna niaka ija, matei lanri garring, siagang tena nikarruki ri janda-jandana.

¹⁶Akkullei attambung-tambung pera'na siagang assusung-susung pakeanna,

¹⁷mingka yangasenna anjo peraka siagang pakeanga la'jari napatangi tau lambusu' pa'maika.

¹⁸Balla'na tau ja'dalaka jappoki sanrapang balla' bolang-bolang, poro pa'balla-ballakang sinampekang, sangkamma balla'-balla' pajaga.

¹⁹Napara'bai kalenna sangkamma tau kalumanynyang, mingka takkulleai napa'mole-molei, ri wattu ambangunna ri tinrona, lanynya' ngasemmi kakalumanynyanganna.

²⁰Battumi bala lompoa antujui sanrapang je'ne' a'ba ti'ring battua. Anging puttusu' ri wattunna bangngi anri'bakangi siagang anre'resangi a'lampa.

²¹Anging battu raya angngangkaki, siagang ambarrasaki battu ri balla'na.

²²Nilissara'mi tanikamaseangnga, na tarpassa lari a'boya pa'la'langngang.

²³Attempa limai taua ri wattunna tu'guru'; kemae-kemaei nihina.”