Read Makassar Version – KITTA' MATANGKASA AYUB 28 Bible Online

AYUB 28 - Makassar Version – KITTA' MATANGKASA bible

AYUB 28

¹“Nia' pangngekeang kemae nibuntulu' peraka; nia' tampa' kemae nipici'nongi bulaenga.

²Bassia nikekei battu ri buttaya; battu ri batua nipassolong tambagaya.

³Nitarrusuki sassang pakkaka, tampa' kaminang lantanga nisalidiki. Anjoreng, lalang ri sassanga, a'boya taua batu-batuang.

⁴Bellai, ri tampa' tenaya tau ammantang, tampa' tenaya nale'ba' nionjo' siagang nilaloi, ta'gentungi taua ri otere' anjama lalang ri kali'bong nikeke, sannaka sinona.

⁵Buttaya appaumba kanre mae ri rupataua, mingka rawanganna tommi anjo buttaya, yangasenna nibulingkara' sa'genna tassimbung buttaya.

⁶Batu niaka lalang butta akkimbolongi batu paramata gau' siagang limbu'bu'na nia' bulaeng ti'no'na.

⁷Jangang-jangang balangkoaka tanaassengai oloanga mange anjoreng, siagang tarruka tale'bakapi anri'ba' rateanna.

⁸Tale'bakapi singaya siagang olo'-olo' sekke' maraengannaya allalo ri agang sino mangea anjoreng.

⁹Angngekei taua batu sa'genna lantang manna pole antekammaya terasa'na, nabongkaraki monconga sa'genna aka'na.

¹⁰Ri wattunna appare' oloang annarrusu' ri moncong batua, nagappai paramata sannaka tinggina anggaranna.

¹¹Sa'genna ri sikamma kabattuanna binangaya angngeke, nampa nagappa apa taccokkoa.

¹²Mingka kemae kacara'dekanga akkulle niboya? Kemaeki' akkulle appilajara' sollanna nikkulle pahang?

¹³Kacara'dekanga tenai ri tangnga-tangngana rupataua; tena angngassengi antekamma lompona anggarang sitojennaya.

¹⁴Nakana dapara'na tamparanga siagang tamparang lompoa angkanaya tenai kacara'dekanga ri ke'nanga.

¹⁵Kacara'dekanga takkulleai nipassambe siagang bulaeng ti'no', yareka takkulleai niballi siagang pera'.

¹⁶Bulaeng siagang paramata kaminang ka'jalaka takkulleai napasangkammai anggaranna.

¹⁷Bulaenga siagang kaca alusu' takkulleai sangkamma anggaranna, takkulleai nibayara' siagang paramata bulaeng toa.

¹⁸Bella tinggina anggaranna kacara'dekanga na giwang, intang, siagang mutiara.

¹⁹Batu paramata siagang bulaeng ti'no, kurangi anggaranna ri akkala' bajika.

²⁰Kemae kabattuanna kacara'dekanga? Kemaeki' akkulle anggappa pammahang?

²¹Tena apa-apa attallasa' le'ba' anciniki, ba'lalo jangang-jangang ri allaka tena todong naciniki.

²²Manna kamateanga siagang kapanrakanga angkana todong, poro kabara'ji bawang nalangngere' ke'nanga.

²³Allata'alaji bawang angngassengi tampa'na kacara'dekanga, Iaji bawang angngassengi oloanga mange anjoreng,

²⁴saba' Ia naciniki cappa'-cappa'na linoa; yangasenna niaka rawanganna langika Najannangngi.

²⁵Ri wattunna Nasare kagassingang anginga, siagang Napattantu pa'baeng-baenna tamparanga;

²⁶ri wattunna Napattantu tampa'na bosia turung, siagang oloang naoloa kilaka siagang gunturuka;

²⁷iaminjo wattua naNacini' kacara'dekanga, Nauji anggaranna, nampa Nasare pangngellaiNa.

²⁸ Nakana Allata'ala ri rupataua, ‘Punna ero' nugappa kacara'dekanga, musti nupakalompoi Allata'ala. Punna erokko ammahang, musti nupakabellai kaja'dallanga.’ ”