Read Makassar Version – KITTA' MATANGKASA AYUB 29 Bible Online

AYUB 29 - Makassar Version – KITTA' MATANGKASA bible

AYUB 29

¹Napannarrusu'mi kana-kananna Ayub, nakana,

²“Dasi-dasi nakkulle kamma ammotere' riolo tallasakku, ri wattungku Najagai Allata'ala.

³Tuli Nasarea' pannulung, Nasingaria' ri wattungku a'jappa lalang ri sassang.

⁴Iaminjo allo-allo kasalewangangku, ri wattunna a'reppese' Allata'ala anjagai ballakku.

⁵Anjo wattua, Narurungang ija' Kaminang Koasaya, na nia' ngaseng ana'-anakku ri tammuliliku.

⁶Jai sikali dadi' wassele' olo'-olo' piaraku. Jai minynya' wassele'na poko'-poko' zaitunku, manna nanjoreng ri butta jaia batunna nilamung.

⁷Punna sipammempoang sikamma tutoa-toana kotaya, niaka' ammempo ri tangnga-tangngana ke'nanga,

⁸a'biring ngasengi ana'-ana' rungkaya, akkaro-karo punna nacinikka' ke'nanga. Kammayatompa sikamma tau toa-toaya ammenteng mangngada'; untu' ambari sallanga'.

⁹Ba'lalo sikamma tumalompoa ammari a'bicara.

¹⁰siagang tunikangalikanga pole ta'bicarayai.

¹¹Manna inai angngaliki mae ri nakke; inai ancinika', napuji jasaku.

¹²Saba' kutulungi tu kasi-asi appalaka bantuang; kubantui ana' kukang tenaya antallassi.

¹³Nipujia' ri tau sannaka lompona kasusaanna, kutulungi sikamma jandaya sa'genna amang nasa'ring ke'nanga.

¹⁴Lambusuki gaukku, tena callangku; kupaentengi kaadelanga situlina.

¹⁵Mae ri tau butaya, inakke a'jari rapang matanna; mae ri tau pesoka, inakke a'jari rapang bangkenna.

¹⁶Mae ri tu kasi-asia inakke a'jari rapang mangge; mae ri tubattu-battua, inakke angngalleangangi.

¹⁷Mingka kutepoki koasana tau pallaka, na kupasalama' tau eroka napa'jari koro'banna.

¹⁸Minasangku erokka' angkasiaki la'bu umurukku, na kumate siagang sannang ri balla' kalengku.

¹⁹Sanrapanga' poko' kayu copponga timbona, gannaki ri je'ne' aka'na, nibasai ri saliu' tangke ca'dina.

²⁰Kutuli nipuji ri sikontu taua, tena le'baka kurang kagassingangku.

²¹A'mereki taua punna kupakainga'; napilangngeri baji' sikamma kana-kanangku.

²²Pungku le'ba' a'bicara, tenamo parallu antambai; ammallasaki kana-kanangku rapang atti'na je'ne' bosia.

²³Sikontu taua rannu ngaseng antarimai kana-kanangku, rapang pamarri antarimai bosia ri wattu bara'.

²⁴Ta'muria' ri ke'nanga ri wattunna tappu' minasa ke'nanga; rupa mate'neku antambai sumanga'na ke'nanga.

²⁵Inakke anna'gala' pimpinang, siagang angngalle kaputusang. Kupimping ke'nanga rapang karaeng ri tangngana pasukanna, na kusaleori ke'nanga lalang si'nana.”