Read Makassar Version – KITTA' MATANGKASA AYUB 32 Bible Online

AYUB 32 - Makassar Version – KITTA' MATANGKASA bible

AYUB 32

¹Lanri tappa' duduna Ayub ri annabana kalenna, tenamo nappiali pole anjo tallua aganna.

²Mingka anjoreng nia' sitau niareng Elihu, ana'na Barakheel, turungang Bus battu ri golongang Ram. Tanakulleai natahang larrona, lanri Ayub nasalakangi Allata'ala nampa napattojeng kalenna.

³Larro tongi mae ri anjo tallua aganna Ayub, lanri tenana nakkulle nageakki kana-kananna Ayub, manna pole nasalakanja ke'nanga anjo Ayub.

⁴Anjo Elihu, iami kaminang lolo ri ke'nanga, lanri kammana attayammi sa'genna le'ba' ngaseng taua a'bicara.

⁵Nacini'namo angkana takkulleami appiali anjo tau tallua, larromi,

⁶na nakana, “Inakke rungka ija', ikatte ngaseng toa maki', lanri kammana anjo, mallaka' na kuranggasela ampaui panggappaku.

⁷Kupikkiriki, ikatteji musti a'bicara, ia la'bi toaya musti ambagei kacara'dekanna.

⁸Mingka assarea kacara'dekang mae ri rupataua, RohNa bawang Allata'ala Kaminang Koasaya.

⁹Na'jari cara'de' taua, teai lanri toana umuru'na; na napahang taua annabaya, teai lanri tinggina umuru'na.

¹⁰Lanri kammana anjo, kipilangngeri sai kanangku; kilappassanga' ampaui panggappaku.

¹¹Sa'barakka' ampilangngeri ngasengki' ri wattunta a'bicara, na kuattayang ri wattunta a'boya kana-kana cara'de'.

¹²Kuparhatikang bajiki; kulangngereki tena kikullei. Takkulleai kipa'nyata kasalang niaka lalang ri kana-kananna Ayub.

¹³Antekamma bateta langkana ngaseng angkana kigappami kacara'dekanga? Lanri tarpassa nibeta ngaseng maki', akkullea ampiali Ayub, Allata'ala bawang.

¹⁴Ikatte napa'bicarai Ayub, teai inakke, mingka tena kulappiali kamma ikatte ngaseng.

¹⁵O, Ayub, lingui ke'nanga, takkulleai ke'nanga appiali; tena akkulle napau ke'nanga.

¹⁶Ammenteng mami ke'nanga, takkulleami a'bicara. Maka musti attayanga' manna na'merekimo ke'nanga?

¹⁷Tena, kamma-kamma anne lappialia'; lakupasuluki panggappaku.

¹⁸Tenamo kusa'bara' attayang. Tenamo nakkulle kutahang bicarangku.

¹⁹Punna a'mereki bawanja', lareppeka' kusa'ring, sanrapang pammoneang rassia siagang anggoro'.

²⁰Musti a'bicara', sollanna sannang pa'maikku; musti appaua' na kuappiali.

²¹Tena lakualleangang lalang ri anne pa'geakkanga siagang tena manna sitau lakupuji-puji.

²²Manna appalecea, tena todong nakuassengi, na ebara' angkana kuassengi kugaukang anjo kammaya, laNahukkung silalonna' Allata'ala.”