Read Makassar Version – KITTA' MATANGKASA AYUB 33 Bible Online

AYUB 33 - Makassar Version – KITTA' MATANGKASA bible

AYUB 33

¹“Kamma-kamma anne Ayub, pilangngeri bajiki anne kana-kana eroka kupabattu.

²Sadiama' ero' a'bicara.

³La'bicara' silambusu'na pa'maikku; kana sitojenna lakupau.

⁴RohNa Allata'ala ampa'jaria' siagang assarea' tallasa'.

⁵Jari, punna akkullei pialia' sinampe'. Pasadia memammi pappialinnu.

⁶Mae ri Allata'ala, ikau siagang inakke tena sisalata battu ri butta pi' ngaseng jaki' nipa'jari.

⁷Jari, tea' mako mallaki ri nakke; tena ri atingku ero' ambetako.

⁸Le'ba'mi kulangngere' apa nupaua, siagang kupahammi apa nupakkanaya.

⁹Nukana, ‘Tangkasakka', tena kasalang kugaukang. Tena callangku siagang tena kodi gaukku.

¹⁰Mingka a'boya-boyai alasang Allata'ala ambalianga', siagang Napasangkamma' musu.

¹¹ Narantei bangkengku; siagang Najannangngi gio'-giokku.’

¹²He Ayub, sala sikali antu panggappanu! Saba' lompoangangi Allata'ala na rupataua.

¹³Angngapa nanusalakang Allata'ala angkanaya taNajampangiai kunrarenna rupataua?

¹⁴A'rupa-rupai bateNa Allata'ala a'bicara, mingka manna sitau tania' amparhatikangi kana-kananNa.

¹⁵ Kamanna nyamang tinrona taua ri wattu bangngia, A'bicarai Allata'ala lalang so'na siagang paccini'.

¹⁶Nasuroi Allata'ala taua mappilangngeri; Napata'bangkai taua siagang pappasaile.

¹⁷PattujunNa, sollanna ammari taua a'gau' dosa na napammari ke'nanga nikanaya borro.

¹⁸TaNapa'biangngai ke'nanga ancuru'; Najagai ke'nanga battu ri kamateang.

¹⁹Napasailei Allata'ala taua nappabattu garring sa'genna pa'risi' sibatu kalenna.

²⁰Anjo lapung tau garring tena pattujunna angnganre, manna kanre kaminang nyamang kodi ngaseng.

²¹A'jari roso' tena pamangeanna tubuna, buku-bukunna kacinikang ngaseng.

²²La'birimmi ammotere' ri anja a'reppese'mi lino kamateanga ri kalenna.

²³Nakulle kapang kalase'renna sisa'bua malaeka'Na Allata'ala ampakaingakai rupataua ri tugasa'na, labattu antulungi.

²⁴Tu'guru' pangngamaseammi anjo malaekaka, nalanakana, ‘Kilappassangi, takkulleai naung ri linona tau matea. Apanne doe' pappasulu'na, sollanna bebasa' ammotere'.’

²⁵La'jari sanna' kassa'na kalenna akkamale kamma tau rungka.

²⁶Punna appala' doangi, lanikamaseangi ri Allata'ala, na lamammujimo mae ri Allata'ala siagang rannu pa'mai' siagang lanipoterammi a'jari baji' tallasa'na ri Allata'ala.

²⁷Na lanakanamo ri dallekanna tau jaia, ‘Lompoi dosaku, lanri ja'dalaka kukana baji', mingka tena Nahukkunga' Allata'ala.’

²⁸Natahamma' Allata'ala sollanna tena kumange ri linona tau matea, sa'gengku nia' ija attallasa' kamma-kamma anne.

²⁹A'mole-molemi Nagaukang Allata'ala yangasenna anne kammaya,

³⁰sollanna akkulle Napasalama' rupataua siagang Nasare mate'ne lalang tallasa'na.

³¹Jari pilangngeri Ayub, tannangi tolinnu a'merekiko, kamma-kamma anne inakke a'bicara.

³²Mingka punna nia' ero' nupau, a'bicara mako; na punna ma'nassa annabako, inakke rella' mangaku.

³³Mingka punna tena, a'merekiko siagang pilangngeria', erokka' ampangngajarrangi kacara'dekanga mae ri kau.”