Read Makassar Version – KITTA' MATANGKASA AYUB 34 Bible Online

AYUB 34 - Makassar Version – KITTA' MATANGKASA bible

AYUB 34

¹“Sai cara'de' ngasengko siagang bajiki akkala'nu? Jari pilangngeri ngasemmi anne kana-kanangku.

³Nakana taua, nyamangi kanrea punna nikanrei, nakana-kana cara'deka punna nipilangngeri.

⁴Anne passalaka musti niparessai nampa assama-samaki' ampahangi.

⁵Nakana Ayub, ‘Tena sala ri nakke, mingka tena Naero' Allata'ala assarea' kaadelang.

⁶Napakkanaia' a'balle-balle, lanri kukanana tena kudoraka. Kamma-kamma anne loko' lompoa', manna tena kusala.’

⁷Le'bakko accini' tau kammaya anne Ayub? Nacalla a'mole-molei Allata'ala.

⁸Nangai aganga siagang tau dorakaya siagang sileporang tau kodi gauka.

⁹Nakana, tena matu-matunna punna usaha taua anggaukangi ero'Na Allata'ala.

¹⁰He sikamma tau cara'deka, pilangngeri sai! Maka lakkullei Allata'ala Kaminang Koasaya anggaukangi kasalanga?

¹¹ Nahukkungi taua situru' panggaukanna, Nagauki taua situru' gau'na.

¹²TaNagaukangngai Allata'ala Kaminang Koasaya nikanaya kaja'dallang; sikontu taua Nasare ngaseng kaadelang.

¹³Battu kemae Allata'ala Nagappa kakoasanNa? Inai ampappirannuangi linoa mae ri Ia?

¹⁴Ebara' angkana Naallei Allata'ala nyawana rupataua, siagang Naalle ammotere' nappasa' tallasa'na,

¹⁵mate ngasemmi sikontu apa a'nyawaya, na'jari limbu'bu'mo taua ammotere' kamma ri assala'na.

¹⁶Jari, punna cara'dekko, parhatikangi, tannangi tolinnu na nupilangngeri.

¹⁷Apaka nusalakangi anjo Allata'ala adeleka siagang porea? Maka nukapangi Nakabirisi Allata'ala kaadelanga?

¹⁸Nahukkungi Allata'ala karaenga siagang pamarentaya punna ja'dala' siagang doraka ke'nanga.

¹⁹Tena Nangngalle mae ri sikamma karaenga, yareka Naparioloangngang tau kalumanynyanga na tu kasi-asia. Lanri yangasenna para bate pare'Naji.

²⁰Ri tangngana bangngia, ti'ring mate silalonna ke'nanga. Nahukkungi Allata'ala pamarentaya, na ancuru'mo ke'nanga; gampang sikali bateNa ambunoi ke'nanga tu barania.

²¹Najannangngi tallasa'na rupataua, Naciniki sikontu dakkana.

²²Tena nikana sassang, manna pole antekamma pakka'na, akkulle ancokkoi tau dorakaya.

²³Taparalluai Napattantu Allata'ala wattunna, battu rupataua untu' Naadeli.

²⁴Tena naparallu Nasalidiki siagang Naparessa, na Napanaung tukoasaya nampa Naangka' sambenna.

²⁵Saba', le'ba' Naassemmi apa nagaukanga ke'nanga; na Nagulung siagang Naancuru' ke'nanga ri wattu bangngia.

²⁶Natempa ka'rangi ke'nanga lanri dosana, ri dallekannai tau jaia Nahukkung.

²⁷Saba', tamannurukiai ke'nanga ri ero'Na na tanajampangia sikontu parentaNa.

²⁸Ke'nanga passabakkang nakkunrareng tu kasi-asia, karru'na ke'nanga nilangngereki ri Allata'ala.

²⁹Punna tappu' a'merekiji bawang Allata'ala, manna sitau tabarani ancallai. Punna Nacokko rupanNa, manna sitau takkulle ambuntuluki.

³⁰Na tanakulleamo bansa-bansaya untu' antahangi makoasa anjallakangi tau ja'dalaka.

³¹O, Ayub, apaka le'ba'mi numangakui dosanu mae ri Allata'ala? Le'ba' mako a'janji talanugaukangnga pole dosaya?

³²Le'ba'kami nupala' sollanna nipicinikiangko salanu? Le'ba' mako assumpa angkana lanupamarimi anjo panggaukang kammaya?

³³Maka lakkullei Naturuki Allata'ala pappala'nu, punna tena nanusitujui panggaukanNa Allata'ala? Kamma-kamma anne ikau musti angngalle kaputusang, teai inakke. Paumi apa panggappanu!

³⁴Sikontu tau cara'deka mattantu lanasitujui; tau cara'de' ampilangngeriai kanangku lanakana

³⁵angkana a'bicara tenai pikkiranna anjo Ayub, siagang angkana tena anggaranna anjo kana-kananna.

³⁶Punna nipilajari bajiki anjo kana-kananna Ayub, la'nyatami angkana sangkammai bicara tau ja'dala' bicaranna.

³⁷Anjo kasalanna natambai pole sirupa dosa; angngewai mae ri Allata'ala, siagang nahinai ri dallekanta ngaseng.”