Read Makassar Version – KITTA' MATANGKASA AYUB 35 Bible Online

AYUB 35 - Makassar Version – KITTA' MATANGKASA bible

AYUB 35

¹“O, Ayub, sala pahangko punna nukapang angkana tena nusala ri paccini'Na Allata'ala.

³Sala pahangko punna akkuta'nangko, angkana apa pangaru dosanu mae ri Ia; siagang passawallang apa lanugappa punna tena nu'gau' dosa.

⁴Inakke lampialiko siagang anjo agang-agannu.

⁵Ciniki langika siagang parhatikangi antekamma tinggina rammanga.

⁶ Punna tena nudoraka, tena Nalarugi Allata'ala. Punna jai salanu, tena Nalanipangarui.

⁷Lanri a'gau' baji'nu, tena nanubantui Allata'ala. Tojeng, tena apa-apa Naparalluang battu ri kau.

⁸Parannuji bawang tau nipakarugi ri dosa-dosanu. Iatommi upa' lanri kabajikannu.

⁹Tau nijallakkanga, akkunrareng; ammarrangi ke'nanga appala' tulung.

¹⁰Mingka teai mae ri Allata'ala, Mappa'jarina napappalakki, assareai panrannuang ri wattu susana ke'nanga,

¹¹siagang assareai akkala' baji' rupataua la'biangngang na jangang-jangang siagang olo'-olo' ri lino.

¹²Akkioki anjo tau nijallakkanga, mingka a'mereki Allata'ala lanri ja'dala'na siagang borrona ke'nanga.

¹³Sia-siaji ke'nanga akkiok-kio' tojeng; Tanicinikai siagang tanipilangngeriai ke'nanga ri Kaminang Koasaya.

¹⁴O, Ayub, la'biangampa punna ikau nukana angkanaya tena nanuciniki, angkanaya nia'mi parkaranu ri dallekanNa na sanna'mo batena nutayang!

¹⁵Nukapangi angkana tena Nahukkungi Allata'ala taua siagang tena Naparhatikangi gau' salaya.

¹⁶Sia-siaji nupannarrusu' bicarannu; Singara'mi angkana tena nupahangi apa nupaua.”