Read Makassar Version – KITTA' MATANGKASA AYUB 36 Bible Online

AYUB 36 - Makassar Version – KITTA' MATANGKASA bible

AYUB 36

¹“Pilangngerimi pole sinampe', siagang sa'barakko, nia' ija lakupau lanri Allata'ala.

³Jai pangngasengangku; lakupa'matu-matui anjo untu' ampa'nyatai angkanaya adeleki Mappa'jariku.

⁴Tena kana-kanangku takontutojeng; niaki tau cara'de' tojenga ri dallekannu.

⁵Anjo Allata'ala tamaka poreNa! Sikontuna Napahang ngasengi. Tena manna sitau Nacini' hina.

⁶Tau dorakaya tena Nalappassangi sallo attallasa', Nasarei kaadelang tau pa'risika.

⁷Naparhatikangi tau lambusuka, Napa'jari koasai ke'nanga sangkamma karaeng, sa'genna nipakala'biri' ke'nanga satunggu-tungguna.

⁸Mingka punna nirante bassi taua, sessai lanri panggaukanna tonji,

⁹jari laNapa'nyatai Allata'ala sikamma dosana siagang kaborroanna ke'nanga.

¹⁰Nasuroi ke'nanga ampilangngeri pappasaileNa siagang nabokoi kaja'dallanna ke'nanga.

¹¹Punna mannuruki siagang anynyomba ke'nanga ri Allata'ala, laamangi siagang lakala'biangi ke'nanga lalang tallasa'na sa'genna ammoterang.

¹²Mingka punna tamappilangngeria ke'nanga, lamatei ke'nanga lalang kadongokanna.

¹³Tau tenaya nale'ba' nia' Batarana, lammoliki larro; manna nihukkung ri Batara, taerokai ke'nanga appala' bantuang.

¹⁴Mate posoi ke'nanga ri wattu rungkana, lanri sangnging hinai lalang tallasa'na.

¹⁵Naajaraki Allata'ala rupataua siagang kapa'risang, Napakei kasusaanga untu' ampasailei taua.

¹⁶Napakabebasa' mako Allata'ala battu ri kasukkarang, sa'genna akkulle nukasia' kasannangnganga, siagang rassi mejang pangnganreannu siagang kanre.

¹⁷Mingka kamma-kamma anne anggappa mako hukkungang situru' kaja'dallannu.

¹⁸Tutuko, teako erokki nitipu ri doe' pammuccu'; teako ero' nipa'lingu lanri kakalumanynyangngang.

¹⁹Sia-sia jako akkio' appala' bantuang, tena bua'-bua'na sikontu pa'bukuannu siagang kagassingannu.

²⁰Teako nakkuki ri bangngi sassanga, wattu cappu'na siagang lanynya'na sikontu bansaya.

²¹Tutuko, teako a'lampa mangei ri kadorakanga. Nisessako lanri ero'nu nikellai ambokoi kaja'dallanga.

²²U'rangi, angkana anjo Allata'ala tamaka lompona koasaNa. Maka nia' guru naagang sangkamma heba'Na?

²³Inai akkulle ampattantui oloanNa yareka barani ampakkanai sala panggaukanNa?

²⁴Ia tuli nipuji lanri bate pare'Na, na ikau pole siratang tongi nupakalompo.

²⁵Sikontu taua Naciniki panggaukanNa; mingka tena manna sitau akkulle ampahang tojeng-tojengi.

²⁶Tamaka mala'biri'Na Allata'ala, takkulleai niselangngi yareka nirekeng siapa sallona taunNa.

²⁷Nabesoki Allata'ala je'neka battu ri butta Napa'jari rammang nampa Napinra a'jari je'ne' bosi ammatti'.

²⁸Napaturungi bosia battu ri rammanga; Napasirangi irateanna rupataua.

²⁹Tena manna sitau ampahangi gio'na rammanga siagang sa'ra gunturuka ri langi' pammantanganNa Allata'ala.

³⁰Nasingari sikontu langika siagang kila', mingka dapara'na tamparanga tuli sassang pakka'na.

³¹Kammaminjo bateNa antallassi bansa-bansaya na Nasare kanre alla'bi-la'bi.

³²Najakkalaki kilaka siagang limanNa nampa Nasuro akkila' ri apa laNatujua.

³³Sa'ra gunturu' a'jari pannanrai angkana labattui anging lompoa, manna olo'-olo' piaraya naasseng tongi angkanaya laniaki anging puttusuka.”