Read Makassar Version – KITTA' MATANGKASA AYUB 37 Bible Online

AYUB 37 - Makassar Version – KITTA' MATANGKASA bible

AYUB 37

¹“Anging lompoa ampa'jari mallaki nyawaku, a'dumba'-dumbaki barambangku napakamma.

²Pilangngeri sa'ranNa Allata'ala, he ikau ngaseng; pilangngeri gunturu' assuluka battu ri bawaNa.

³Nalappassangi kila'Na malla'bang lino; Nakiringi gunturu'Na sa'genna cappa'-cappa' linoa.

⁴Nampa, nia' kalangngerang sa'ranNa ammarrung, sa'ra rammang siagang gunturu'; na ri alla'na anjo sa'ra a'galatturuka, akkila'-kila'mi kilaka ri kere-keremae.

⁵Lanri parentaNa Allata'ala, na'jarimo apa appakalannasaka, iamintu apa-apa tenaya nakkulle nipahang ri akkalatta.

⁶Tu'guru'mi bosi eska lanri parentaNa, turummi bosi lompoa lanri passuroNa.

⁷Napammari jama-jamanna rupataua, sollanna naasseng ke'nanga angkana Ia anjama.

⁸Kammayatompa olo'-olo' liaraka antamaki ri kali'bonga siagang kali'bong batua, nampa a'la'lang lalang ri pa'ru'munganna.

⁹Battu timboroki anging puttusuka battu waraki dinging sanna' dudua.

¹⁰Nappasa'Na Allata'ala ampa'jari batui tompo'na je'ne' luaraka, Napinrai a'jari es batu terasaka.

¹¹Napierangngi rammanga siagang je'ne', naccaya rammanga nisingari ri kila'.

¹²Allayangi rammanga alla'bang lino, lanri parentaNa Allata'ala na'gio' ri kere-keremae.

¹³Appaturungi Allata'ala bosi untu' ambasai buttaya, yareka untu' anghukkungi umma' rupataua; gassing tongi untu' Napappicinikang mae ri ke'nanga, antekamma tuli lompona pangngamaseanNa satunggu-tungguna.

¹⁴A'mereki mako sinampe', he Ayub, siagang pilangngeri anne; parhatikangi sikamma apa appakalannasa' gau'Na Allata'ala.

¹⁵Nuassengkai antekamma bateNa Allata'ala assare parenta sa'genna tassioro' kilaka battu ri rammanga siagang langika?

¹⁶Maka nuassengi antekamma batena allayang rammanga lanri kaporeanNa Allata'ala?

¹⁷Tena, poro akkullenuji bawang akkunrareng napakamma bambang punna nituju linoa ri anging battu timboro'.

¹⁸Maka akkulleko sangkamma Allata'ala ampabantangi langika siagang ampa'jari terasaki sangkamma bassi nibajaka yareka kacaya?

¹⁹Ajaraki bedeng ikambe apa musti nakana ikambe mae ri Allata'ala; tena akkulle napakasingara' ikambe, tena bonena pikkiranna ikambe.

²⁰Taeroka' a'bicara appala' doang mae ri Allata'ala gassingka anggappai passabakkang nakupa'jari cilaka.

²¹Anne kamma cayana langika sanna' singara'na sa'genna napakatilu mataya; anginga ampakatangkasaki allaka lanri mammiri'na.

²²Nia' caya kamma bulaeng ammumba wara', nilannasa'mo ri kala'biranNa Allata'ala.

²³Tamaka lompona koasaNa Allata'alata; takkulleaki' anreppesi, tuli lambusu'Na siagang adele'Na; tale'bakai Najallakkang rupataua.

²⁴Lanri kammanami nasiratang nipakalompo ri manna pole inai, na taNajampangia tau nakanaya kalenna cara'de'.”