Read Makassar Version – KITTA' MATANGKASA AYUB 38 Bible Online

AYUB 38 - Makassar Version – KITTA' MATANGKASA bible

AYUB 38

¹Nampa a'bicaramo Batara battu lalang ri anging lompoa mae ri Ayub, Nakana,

²“Inaiko antu, nubarani kamma ranggasela ri kacara'dekangKu lalang ri anjo bicara dongo'nu siagang tenaya bonena?

³Kamma-kamma anne dallekamMa' sangkammako bura'ne, siagang pialimi anne sikamma pakkuta'nangKu.

⁴Nia' memang makoka ri wattunna Kupa'jari linoa? Punna jai padeng pangngassengannu, pauamMa'!

⁵Inaika ampattantui luara'na linoa? Inaika angngukkuruki siagang otere'? Maka nuassengi pappialinna?

⁶Antekamma batena najarre' ammenteng benteng-benteng pattumpa'na linoa? Inai ampadongkoki batu pundasi tangnga majarre',

⁷ri wattu akkelong sikamma bintoeng bari'basaka siagang akkio' rannu sikamma apa attallasaka ri suruga?

⁸ Inaika antongkoki pakke'bu'na untu' antahangi je'ne' tamparanga, ri wattunna assulu' je'neka battu lalang ri battanna buttaya?

⁹INakkemi ampayungi tamparanga siagang rammang, anrokoki siagang sassang.

¹⁰INakke ampattantui pa'baeng-baenna tamparanga lompoa siagang antahangi je'ne'na siagang pakke'bu' ta'joli.

¹¹Kukana ri ia, ‘Iaminne pa'baeng-baenna. Teako lalloi! Anrinni musti ammantang sikamma bombang lomponu.’

¹²He, Ayub, maka le'bakko manna sikalija bawang assuroi battu subu-subua?

¹³Le'bakko assuroi alloa anta'galaki buttaya siagang nabe'besang tau ja'dalaka battu ri tampa' paccokkoanna ke'nanga?

¹⁴Singara'na alloa ampa'nassai nicini'na monconga siagang ka'bunga sanrapang sitempele' ri butta pi' siagang ri juba nilappaka.

¹⁵Ta'lalo singara'na alloa mae ri tau tenaya Batarana, na natahang ke'nanga anggaukangi katerassanga.

¹⁶Maka le'bakko naung ri kabattuanna siagang dapara'na tamparanga? Le'bakko a'jappa-jappa ri dapara'na tamparang lompoa?

¹⁷Niakka tau le'ba' ampicinikiangko pakke'bu' lompoa ri dallekanna lino kamateang sassang makkapuka?

¹⁸Maka akkulleko angkira-kirai luara'na linoa? Appiali mako punna nuassengi.

¹⁹Maka nuassengi battu kemae anjo singaraka? Siagang kemae sitojenna kabattuanna sassanga?

²⁰Maka akkulleko ampattantui pa'baeng-baenna sassanga siagang singaraka? Yareka ansuroi ke'nanga ammotere' punna niaki battu?

²¹Tantu akkulleko, lanri toa mako, siagang lanri nia' memang mako, ri wattunna nipa'jari linoa!

²²Le'bakkako mange angkunjungi gudang-gudangKu tampa' je'ne' eska siagang je'ne' batua,

²³Kuboli' untu' wattu kasukkarang, untu' wattu pa'bundukang siagang passibuno-bunoang?

²⁴Maka nuassengi tampa' pammantanganna mataalloa? Yareka battu kemae assala'na anging battu rayaya?

²⁵Inaika ampangngekeangi kaloro' bosi lompoa siagang assarei oloang gunturuka siagang kilaka?

²⁶Inaika appaturung bosi ri parang lompoa, siagang ri tompo'na butta napammantangia rupataua?

²⁷Inaika ansirangi butta kalotoroka siagang ta'ronanga sa'genna accu'la ngaseng sikontu timbo-timboanga?

²⁸Apaka nia' mangge tangka'na bosia? Inai bapa'na atti'-atti'na je'ne' saliuka?

²⁹Apaka nia' amma'na je'ne' eska? Inai allassukangi saliu' a'batua?

³⁰Inai ampinrai je'neka a'jari batu, siagang ampa'jari ka'doroki tompo'na tamparanga?

³¹ Maka akkullei nusikko' akkawarrang bintoeng Kartikaya? yareka nula'gasa' passikko'na bintoeng Belanti'?

³²Maka akkulleko angngului sikamma bintoenga ri wattunna, siagang nupattantu oloanna bintoeng Bidu' lompoa siagang ca'dia?

³³Maka nuassengi sikamma hukkunga ri langika? siagang akkullei nugaukang ri anne linoa?

³⁴Akkulleko ampakkiokangi parentaya mae ri rammanga, siagang napiturungiko bosi lompo?

³⁵Siagang punna nusuro akkila'-kila' kilaka, maka battui ke'nanga angkana, “Iye' karaeng!”?

³⁶Battu kemae naasseng jangang-jangang ibisi' angkana ringngapanna nalanai' je'neka ri Binanga Nil? Inai ampauangi jangang lakia angkana labattui bosia?

³⁷Inai ganna' cara'de'na anrekengi rammanga nampa nabulinta' sollanna turung bosia,

³⁸bosi ampakaterasakai limbu'buka na'jari peo' siagang buttaya nassidakki'-dakkiki?

³⁹Akkullekoka ampangngondangangi singaya untu' kanrena, ampakabassoroki battanna ana'-ana'na,

⁴⁰punna a'la'lang ke'nanga ri kali'bonna yareka ammantang ke'nanga ri pa'ru'munganna?

⁴¹Inai ambantui jangang-jangang kalaa' cipuruka anri'baka ri kere-keremae a'boya kanre? Siagang inai todong antulungi punna ammarrang ana'-ana'na mae ri nakke appala' kanre?