Read Makassar Version – KITTA' MATANGKASA AYUB 39 Bible Online

AYUB 39 - Makassar Version – KITTA' MATANGKASA bible

AYUB 39

¹Maka nuassengi angkana ringngapanna nanilassukang bembe monconga ri anronna? Le'bakko amparhatikangi jonga liaraka allassukangi ana'na?

²Nuassengi angkana siapa sallona ke'nanga tianang? Maka akkullei nurekeng ringngapanna nalammana'?

³Nuassengi angkana ringngapanna nalanapakalongkong kalenna, nampa nalassukang ana'-ana'na?

⁴Pila' katambangi lompona siagang gassinna ana'-ana'na ri parang lompoa; a'lampai ke'nanga siagang tammoterai mae ri anronna.

⁵Inai allappassangi keledai liaraka ri romanga? Inai alla'gasi otere'na nampa nalappassang a'lampa mange-mange?

⁶Kusarei parang lompoa a'jari balla'na, siagang parang-parang ce'laya a'jari pammantanganna.

⁷Napakabellai kalenna battu ri kota-kota suaraka, tena akkulle ampannabai siagang ampajamai.

⁸Parang rukuka ri moncong tampa' pangnganreanna, naboyai timbo-timboang moncongbuloa anjoreng.

⁹Apaka eroki sapi liaraka nupajama? Maka eroki a'bangngi lalang ri bara nupareka?

¹⁰Maka akkullei nusikko' nampa nupassai ampa'jekoangko? Maka akkullei nusuro angkaerangko kokonnu?

¹¹Maka akkullei nurannuang buku magassinna, nampa nusuroi anjamangko jama-jamang terasa'nu?

¹²Apaka akkullei nurannuang ampasse'reangko kattoannu nampa naerang mae ri pa'lessorannu?

¹³Tamaka linta'na pakkape'na ka'nyi' jangang-jangang untaya! Mingka takkulleai napasangkammai ri'ba'na kondoa.

¹⁴Jangang-jangang untaya a'bayao ri buttaya, nampa nabokoi; jari kassika angngammuki bayaona.

¹⁵Tanasadariai angkana gassingka nionjokangi ri taua yareka ri olo'-olo' liaraka.

¹⁶A'gio' kammai angkana teai ia pata ana' anjo ana'na; tanajampangiai punna poro sia-sia bawang usahana.

¹⁷INakkemi ampa'jari toloi siagang dompalaki, taKusareai akkala' siagang kacara'dekang.

¹⁸Mingka punna appakkaramulamo lari kancang, nabetami larina jaranga siagang pabaeya.

¹⁹He Ayub, ikauka assarei buku magassing jaranga siagang bosanna a'rombenga ri kacikoro'na?

²⁰Ikauka assuroi a'lumpa' kamma katimbang, siagang sa'ranna untu' ampakamallaki taua?

²¹Akkaereki butta ri ka'bunga siagang rannu, lompo sumanga'na a'bakka mange ri tampa' pa'bundukanga.

²²Tanaassengai nikanaya annekkere' siagang malla'; tena pa'dang akkulle ampaunduruki.

²³Sanjata nasalempanga pabaena a'garincingi siagang accillaki nataba caya.

²⁴A'rinra-rinrai sumanga'na anjo jaranga lari; punna assa'ra tarompeka tanatahangngami kalenna.

²⁵Akkassumi punna assa'ra tarompeka battu bellai naara' rasanna pa'bundukanga. Nalangngereki sa'ra lompona sikamma perwiraya ri wattunna assare parenta ke'nanga.

²⁶Apaka nuajaraki balangkoaka anri'ba' punna takka'rang ka'nyi'na anri'ba' a'lampa timboro'?

²⁷Parentanuka naturuki jangang-jangang rajawalia ri tenanapa napareki ru'munna ri moncong tinggia?

²⁸Ri coppo'na moncong batua napare' balla'na; cappa'-cappa' batu ciduka a'jari pattahanganna.

²⁹Battu anjorengi najagai sikamma kabattuanga matanna angngodo' ri sikamma apa lanajakkalaka.

³⁰ Kemae nia' apa mate, anjoremmi antu nia', na cera'na anjo apa matea niinungi ri ana'-ana'na.”