Read Makassar Version – KITTA' MATANGKASA AYUB 4 Bible Online

AYUB 4 - Makassar Version – KITTA' MATANGKASA bible

AYUB 4

¹A'bicarami Elifas angkana, “Ayub, maka tenaja nubirisi' punna akkana'? Takukulleai a'mereki la'bi sallo.

³Jai tau le'ba' nusare pangngajarang, na ia lammaya nupakajarreki.

⁴Kana-kanannu assarei sumanga', napabangungi tau tatto'roa, tau lausuka, na tau posoa.

⁵Mingka anne kamma kalennu natuju susa; ta'bangkako, nutappu' minasa.

⁶Sai jarreki tappa'nu mae ri Allata'ala; sai tena callanna tallasa'nu? Punna kamma, siratanna tappakko siagang tena nutappu' minasa.

⁷Pikkiri' sai, le'bakika tau tenaya nasala nituju ri cilaka siagang bala?

⁸Kuassengi battu ri paccinikku, angkanaya tau appa'jekoa ri koko kaja'dallang, siagang appakioro' bala a'jari bine lamungang, lakkattoi cilaka siagang kasusaang!

⁹Sanrapang anging puttusu', kammaminjo larroNa Allata'ala ampanraki ke'nanga sa'genna cappu'!

¹⁰Tau ja'dalaka ammammuki siagang appiraungi, sanrapang singa appiraung ke'nanga. Mingka Natongkoki Allata'ala bawana ke'nanga siagang natepoki gigi-giginna.

¹¹Matei ke'nanga sanrapang singa kakurangang ri kanre, sa'genna tassia'-siara'mo ana'na tamattantua.

¹²Le'baki nia' pappiunju' battu ri nakke, sanrapang tau a'bici' alusu' mae ri tolingku.

¹³ Naricui tinroku na kunaganggu, sanrapang asso'na kodi ri lantang bangngia.

¹⁴Ta'bangka' na kuannekkere'; ta'ge'goso' sikontu tubuku, annekkere'.

¹⁵Battui anging ca'dia anseroi rupangku, nammenteng bulu-bulungku.

¹⁶Nia' ammenteng ri dallekangku; kujanjangi, mingka takuassengai. Nampa nia' sa'ra kulangngere' anreppeki sino dudua, angkana,

¹⁷‘Maka akkullei taua tena salana ri dallekanNa Allata'ala? Maka akkullei tena callana ri dallekang matanNa Mappa'jarina?

¹⁸Ba'lalo sikamma atanNa ri suruga, takkulle nipatappa' ri Ia. Ba'lalo malaeka'-malaeka'Na nagappai salaNa siagang callaNa.

¹⁹La'bipa apa attallasa' nipareka battu ri butta pi', limbu'buka nipare', akkullea niti'rasa' rapang alitana!

²⁰Anjo pa'jari kammaya attallasaki ri bari'basa', nampa mate sia-sia ri wattu karueng, na taniu'rangiamo satunggu-tungguna.

²¹Na tappela' ngasemmo apa napatanga; matemi natanggappaya akkala' baji'.’