Read Makassar Version – KITTA' MATANGKASA AYUB 40 Bible Online

AYUB 40 - Makassar Version – KITTA' MATANGKASA bible

AYUB 40

¹“He Ayub, nuewA', iNakke Allata'ala Kaminang Koasaya; erokko ampappibetangi kalennu yareka erokko a'gea'?”

³Appialimi Ayub ri Batara, angkana, “A'bicara kamma' tau toloa, o Batara. Apami lakkulle kupappialiang? Tenamo apa-apa ero' lakupau.

⁵Jai dudumi le'ba' kupau.”

⁶Nampa a'bicaramo pole Batara battu lalang ri anging lompoa mae ri Ayub.

⁷Nakanamo Batara mae ri Ayub, “A'dalle' maeko ri Nakke sangkamma bura'ne, na nupiali anne sikamma pakkuta'nangKu.

⁸Maka eroki nusassali kaadelangKu, nupattojeng kalennu nampa iNakke nusalakang?

⁹Maka gassing kammako iNakke? Maka akkullei sa'rannu a'gunturu' kamma sa'rangKu?

¹⁰Beloi kalennu siagang kaga'gang siagang kalompoang, pakei kagammarranga siagang kala'biranga.

¹¹Ciniki ke'nanga tau tinggi pa'maika; pa'betteseki larronu siagang pakatunai ke'nanga.

¹²Iyo, ciniki tau borroa, siagang padundui! Licaki tau ja'dalaka ri tampa'na

¹³Tarawang ngasengi ke'nanga lalang ri limbu'buka; kurungi ke'nanga lalang ri linona tau matea.

¹⁴Nulanipuji lanri kagassingang kalennu memang todong.

¹⁵Parhatikangi lapung jarang niarenga Behemot, olo'-olo' sannaka lompona; sangkamma ikau, ia bate parekKu tonji. Ruku'-rukuka a'jari kanrena, sangkamma sapi biasaya.

¹⁶Mingka parhatikangi buku magassing lalanga ri kalenna siagang kakassakang niaka ri ura'-ura'na;

¹⁷Napaentengi ingkonna sanrapang poko' kayu arasa', ura'-ura' bongganna sanna' kassa'na siagang terasa'na.

¹⁸Buku-bukunna kassaki sangkamma tambaga, bangkenna kassa' tongi sangkamma bassi baja.

¹⁹Ri sikamma apa attallasa' bate parekKu, iami kaminang appakalannasa'; Tumappare'na bawang akkulle ambetai!

²⁰Ri bulu'-bulu' pakkare'-karenanna siagang rannu olo'-olo' liaraka, attimbomi rukuka a'jari kanrena ke'nanga.

²¹Anra'bai irawanganna rompo' katintinga, ri alla'nai nipaya accokko.

²²Rompo' katinting alla'langi ke'nanga siagang bayang-bayang. Poko' kayu bangko ri biring binangaya alla'langi ke'nanga.

²³Tena sikali malla'na manna nasanna' sarrinna lo'loro'na Binanga Yordan, tuli sannanna manna pole nituju rupanna ri je'ne'.

²⁴Inaika barani ampakabutai matanna, nampa najakkala' siagang natado' muncenna?”