Read Makassar Version – KITTA' MATANGKASA AYUB 42 Bible Online

AYUB 42 - Makassar Version – KITTA' MATANGKASA bible

AYUB 42

¹Appialimi Ayub ri Batara, angkana “Kuassengi o, Batara, angkana iKattemi Kaminang Koasa; manna apa akkulleji Kigaukang.

³ Kikuta'nanga' angkana angngapa kubarani ranggasela ri kacara'dekanTa nampa inakke kalengku tena apa-apa kuasseng. Kupaui apa-apa tenaya nakupahangi, apa-apa sannaka appakalannasa'na ri kalengku anne.

⁴ Kisuroa' appilangngeri ri wattunTa a'bicara, siagang appiali punna akkuta'nangKi'.

⁵Riolo, pangngassengangku mae ri Katte apa kulangngere'ji battu ri taua, mingka kamma-kamma anne kuassengKi' lanri assidallekangKi'.

⁶Lanri kammana anjo, tu'guru' siri'-sirika' punna kuu'rangi sikamma kana-kanangku na kusassala' kalengku ammempoma' lalang ri limbu'buka siagang aua.”

⁷Le'ba'na a'bicara Batara mae ri Ayub, Nakanamo Batara mae ri Elifas, “LarroA' ri kau siagang ruaya agannu, lanri teai apa sitojennaya nupau ri KalengKu. Mingka atangKu Ayub tena nakamma anjo.

⁸Jari, angngalleko kamma-kamma anne tuju kayunna sapi laki siagang tuju kayunna bembe laki, nampa a'lampako mange ri Ayub. Passareang ngasengi anjo sikammaya, a'jari koro'bang untu' kalennu. Lappala' doangi Ayub untu' ikau ngaseng, nampa laKupilangngeri pappala' doanna. Tena nalaKupakasirikko, manna nusiratang annarima hukkungang. Teai kammatojenga nupau ri passala'na KalengKu, mingka Ayub napaui kammatojenga.”

⁹Nagaukammi Elifas, Bildad siagang Zofar, anjo apa Napassuroanga Batara, siagang Natarimami Batara pappala' doanna Ayub.

¹⁰ Nampa, ri le'ba'namo Ayub appala' doang untu' anjo tallua aganna, nipa'jari kalumanynyammi ammotere' ri Batara; a'lappi ruami kakalumanynyanganna na rioloa.

¹¹Sikontu daenna siagang sari'battang bainena Ayub, sikontu passiassengang sallona, battumi angkunjungi, nampa assua'-suara' siagang ia ri balla'na. Massing napaumi ke'nanga angkana turu' tongi susa ke'nanga lanri sikontu susa le'baka Napabattu Batara mae ri kalenna, nampa nasaleori Ayub. Massing assaremi ke'nanga ri Ayub siapa are jaina doe' siagang tasse'rena cincing bulaeng.

¹²Nibarakkakimi Ayub ri Allata'ala la'bi-la'biangngang pole lalang sesa tallasa'na, na ri tenanapa nale'ba' nituju ri bala. Nia' napatang Ayub barang-barang: 14.000 kayu gimbala', 6.000 kayu unta, 2.000 kayu sapi, siagang 1.000 kayu keledai.

¹³Anggappai tuju ana' bura'ne na tallu ana' baine.

¹⁴Ana' baine toana niarengi Yemima, makaruaya niarengi Kezia, siagang bungkoa niarengi Kerenhapukh.

¹⁵Ri sikontu anjo pa'rasanganga tenamo sangkammanna ga'gana anjo tallua ana' bainena Ayub. Nisaremi ke'nanga pambageang battu ri warisi'na manggena, sangkamma sari'battang bura'nena ke'nanga.

¹⁶Le'baki anjo attallasa' iji Ayub sibilangngang patampulo taung sallona, sa'genna narapi' iji nacini' sikamma cucu-cucunna siagang massing ana'-ana'na anjo cucu-cucunna.

¹⁷Nampa matemo Ayub lalang ri toa dudunamo umuru'na.