Read Makassar Version – KITTA' MATANGKASA AYUB 6 Bible Online

AYUB 6 - Makassar Version – KITTA' MATANGKASA bible

AYUB 6

¹Appialimi Ayub, angkana, “Ebara' angkana nitimbang anne pa'risikku,

³mattantu lompoangngangi na kassika ri tamparang lompoa. Jari, teako lannasa' punna kana-kanangku tatutuai siagang karo-karoi.

⁴Pana battua ri Kaminang Koasaya natarrusuki kalengku; a'la'bangi racunna ri sikontu nyawa siagang batangkalengku. KahebakkanNa Allata'ala sanna' appakamalla'na, na battu ambakkaia' sanrapang pasukang musu.

⁵Sukku' pakkasia'na keledaia punna nisare ruku' lolo, kammayatompa sapia punna nisare kanre.

⁶Mingka ia kanre la'baya, inai angngai? Kemae lakkulle nia' kasia'na kebo'na bayaoa?

⁷Tena pattujungku lasseroi; erokka' takkoa' punna kukanrei.

⁸Angngapa nakuttu Allata'ala ampilangngeri pappala' doangku? Angngapa natena Naparhatikangi pakkiokku?

⁹Poro ero' lalo Allata'ala allicaka'! Poro Nabuno laloma'!

¹⁰Akkulleangangi anjo kammaya a'jari panynyaleori ri nakke; la'jogeka' ri tangngana pa'risikku. Sikontu parentaNa Allata'ala Kaminang Koasaya kuturukimi siagang tulusu' kuparhatikangi.

¹¹Apa kagassingangku sa'gengku nia' tongija? Apa panrannuangku nakuero' ija attallasa' la'bi sallo?

¹²Kammakai batua kassa'na anne kalengku? Tambagaka nipare' anne tubuku?

¹³Cappu'mi kagassingangku a'boya bantuang; tenamo pannulung mae ri kalengku.

¹⁴Lalang ri pa'risi' kammaya anne, kuminasai sahaba' sitojennaya. Apaka tuli jarre' iji tappakku yareka kubawang-bawangngammi Kaminang Koasaya.

¹⁵Mingka ikau ngaseng, he agang-agangku, takkulleako nipatappa' siagang nirannuang. Sanrapangko kaloro' cappuka je'ne'na, punna tena nabattu bosia.

¹⁶Sanrapangko binanga sannang siagang tagioka, lanri nitongko' ri bosi es siagang je'ne' a'batu.

¹⁷Silalonna punna battu timoroka, tappela'mi anjo eska siagang je'ne' a'batua na tena batena. Kalotoro'mi dapara'na binangaya, tena je'ne'na na kalotoro' taba sikali.

¹⁸Tau lalang pa'jappanga sala oloangi ri wattunna a'boya je'ne'; a'la'bang mange-mange sa'genna mate ri paranga.

¹⁹Tau lalang pa'jappang battu ri Syeba siagang battu ri Tema a'boya je'ne' siagang narannuanna.

²⁰Mingka sia-siai panrannuanna ke'nanga ri biring kaloro' tenaya je'ne'na.

²¹Ikau ngasemmi sanrapanna anjo binangaya, bela; ammundurukko siagang mallakko anciniki pa'risikku.

²²Apa saba'na? Apaka nia' kupala' ri kau? Yareka kusuroko ammuccu' doe' ri taua untu' kaparalluangku?

²³Apaka kupalaki kunipasalama' siagang niallei ri musu tenaya pangngamaseanna?

²⁴Jari, ajarima', picinikianga' kasalangku! La'merekia' siagang lakupilangngeri kana-kanannu.

²⁵Kana-kana lambusuka, appakasannangi pa'mai', mingka bicarannu ngaseng kosongi, tena battuanna!

²⁶Sikontu kana-kanangku nupare' anginji bawang; tena matu-matunnu ampialia' anne, tau tappu' minasayamo.

²⁷Ba'lalo ana' kukanga nupaccampallekangi sarenna, agang baji'nu nujekkongi sollannu kalumanynyang.

²⁸Coba sai, parhatikanga'; masa' la'balle-ballea' mae ri kau ngaseng?

²⁹Teako a'gau' tenai naadele', angngu'rangiko! Teako callaia', ma'nassa tena tojeng kusala.

³⁰Maka nukapanga' a'balle-balle, takkullea angngassengi sisalana bajika siagang nicallaya?