Read Makassar Version – KITTA' MATANGKASA AYUB 8 Bible Online

AYUB 8 - Makassar Version – KITTA' MATANGKASA bible

AYUB 8

¹Nakanamo Bildad, “Siapapi sallonu la'bicara kamma antu? Kana-kanannu sanrapangi anging ammarrung.

³Tale'bakai Napa'jekko Allata'ala kaadelanga; tale'bakai salasa ampaentengi katojenganga.

⁴Gassingka ana'-ana'nu doraka mae ri Ia, jari siratangi nihukkung ke'nanga ri Ia.

⁵Mingka punna a'la'langko mae ri Ia, appala' pangngamaseang siagang appala' popporo',

⁶punna lambusu' pa'mai'nu, tena callannu, laNatulungko linta' Allata'ala; na a'jari pa'balasa'na, laNapakabajiki ammotere' ruma tangganu.

⁷Kakalumanynyangngannu tappelaka tena anggaranna punna nipasinjai siagang apa nugappaya sallang.

⁸Parallui nuparhatikang tau cara'deka ri jammang riolo, na nunawa-nawa pangalamanna boe-boenu.

⁹Tallasatta bodoji, tena apa-apa niasseng; allota sanrapanji bayang-bayang.

¹⁰Pilangngeri kana-kananna tau cara'deka riolo, nasareko anne pappilajaranga, angkanaya,

¹¹‘Ri tampa' niaka bawang je'ne'na attimbo nipaya; ri butta appeokaji nia' pandang.

¹²Punna kalotoro' je'ne'na, ta'ronangi anjo nipaya, lintakkangngangi timbona timbo-timboang maraenganga. Na sitojenna coppongiji siagang teaipi wattunna nialle siagang nipake.

¹³Kammaminjo tau tenaya Batarana. Nakaluppai Allata'ala, siagang tenamo panrannuanna.

¹⁴Bannang alusu' a'jari panrannuanna; ru'mung lawa'-lawa' napatappa'.

¹⁵Maka gassingkai anjo ru'mung kammaya punna nipareki pammanjengang? Maka attahangi anjo bannang kammaya punna nipareki panna'gallang?’

¹⁶Sanrapang rea, bajiki nasa'ring tallasa'na tau tenaya Batarana; punna nisingari ri allo, coppongi timbona na napirassi kokoa.

¹⁷Aka'na nakaluki batu-batu ri buttaya; akkalu' jarreki, tagampangai ta'lagasa'.

¹⁸Mingka, cobasai bi'bu' kamma-kamma anne anjo reaya, kamma le'ba' tenale'bakai nia' anjoreng.

¹⁹Iyo, kasannanganna tau ja'dalaka iaji anjo bawang; battui tau maraenga nampa nisambeang.

²⁰Mingka Allata'ala tale'bakai Nabokoi tau jarreka tappa'na, tale'baka tongi Natulung tau dorakaya.

²¹Bawanu laNapakakkalaki, muncennu lama'reja-rejai.

²²Lasiri'-siriki siagang latunai nasa'ring tau birisika ri kau, na balla' tau ja'dalaka lanipanraki sa'genna ancuru'.”