Read Makassar Version – KITTA' MATANGKASA AYUB 9 Bible Online

AYUB 9 - Makassar Version – KITTA' MATANGKASA bible

AYUB 9

¹ Mingka appialimi Ayub angkana, “Memang, kuassengi, angkana tena nasala kana-kanannu. Mingka, antekamma lakkulle taua akkara-kara siagang Allata'ala siagang lanibeta?

³Punna nia' sisa'bu pakkuta'nanNa Allata'ala, manna se're takkulle napiali rupataua.

⁴Allata'ala sanna' cara'de'na siagang sanna' koasana; inai akkulle attahang ambaliangi?

⁵Napaletteki Allata'ala monconga na tena tau angngassengi, nampa Nabulingkara' lalang larroNa siagang sekke'Na.

⁶Napage'gosoki Allata'ala buttaya sa'genna ta'goccang linoa, siagang a'gio' benteng pattumpa'na linoa.

⁷Akkullei Napisangkai Allata'ala ammumba alloa ri wattu bari'basa', na Natanakellaia assioro' sikamma bintoenga ri wattu bangngi.

⁸Napaka'rangi langika natena ambali; Naonjo'-onjokangi dongko'na naga tamparanga.

⁹ Appareki barrisi' bintoeng timborang ri langika, kammayatompa bintoeng Bidu', Belantik, siagang Kartika.

¹⁰Takkulleaki' ampahangi sikontu bate pare'Na, tanikulleai anrekengi sikamma gau' appakalannasa'Na.

¹¹Allaloi ri dallekangku, mingka takucinikai; numaloi ri sa'ringku, mingka tena na'nyata mae ri nakke.

¹²Punna anrampasaki, inai barani ampisangkai? Yareka barani akkuta'nang angkana, ‘He, apa Nupare'?’

¹³Tena Natahangi Allata'ala larroNa siagang bambanna pa'mai'Na; manna sikamma pambantuna Rahab tundu' ngaseng todong mae ri Ia.

¹⁴Jari antekamma lakkulle kugeakki? Kana-kana apa lakupialiangi?

¹⁵Manna tena nakusala, apa kulleku, pantaranganna appalaka pangngamaseang battu ri Allata'ala Hakingku?

¹⁶Ebara' angkana appiali punna akkioka', bata-bata', maka ero' tojenji ampilangngeri sa'rangku?

¹⁷Nalicaka' lalang ri anging puttusu', na Natambai pa'risikku natena passabakkanna.

¹⁸TaNapa'biangnga' a'mai' manna sinampe'ja; ba'lalo Napitambungianga' pa'risi' lompo.

¹⁹Jari apaka musti kuewai a'gassingang? Mingka ciniki, antekamma heba'na kagassinganNa! Ebara' angkana kupaui ri Ia angkana kukabattallangi, inai barani langkioki mange ri pangadelang?

²⁰Jarreki tappakku ri Ia siagang tena ku'gau' dosa, mingka bawaku kamma kusa'ring kabalekanna napau; kana-kana assuluka ri muncengku, kamma kusa'ring nasalakanga'.

²¹Tena kusala, mingka tena kujampangi. Lanrema' attallasa'. Untu' inakke tenamo parallu; tau salaya siagang tau annabaya, sangkammaji sarenna: rua-rua laNapanraki ngasengi Allata'ala.

²³Punna mate silalonna tau tenaya salana, poro ammakala'ji bawang Allata'ala.

²⁴Napassareangi Allata'ala buttaya mae ri tu dorakaya, siagang Napa'jari buta ngasemmi sikamma hakinga. Kammaminjo Nagaukang ngaseng Allata'ala, punna tena naIa, inai pole anggaukangi kammaya?

²⁵Allalo karo-karomi sikamma allo tallasakku, nampa allanynya' natena nabaji' nasa'ring.

²⁶Sanrapang biseang kancang, allalomi linta' tallasakku, sallinta' balangkoa' anri'ba' naung angngalle ana' jangang.

²⁷Punna erokka' ta'muri siagang ammakkala' rannu, punna kucoba angkaluppai pa'risikku, battui ammotere' susaku, angngondanga'; saba' kuassengi, tuli Nasalakanga' Allata'ala.

²⁹Jari punna kamma, apa kujampangi?

³⁰Tena sabung akkulle antangkasi dosaku!

³¹Natallangnganga' Allata'ala lalang ri ra'masaka, sa'genna manna pakeangku nakana ngaseng appakaringi'-ringika'.

³²Ebara' angkana rupatau anjo Allata'ala, akkullei kupiali; nampa a'lampa ikambe mange andallekang ri pangadelang untu' ampa'le'baki sikamma pa'beserangku siagang Ia.

³³Mingka tena haking ri alla'na ikambe akkulle angngadeli ikambe sipa'rua.

³⁴Dasi-dasi Nammari Allata'ala anghukkunga' na Napakabella kahebakkang larroNa battu ri nakke.

³⁵Tena kumalla' ri Ia na kula'bicara kamma-kamma anne, saba' kuassengi pa'mai' kalengku.