Read Makassar Version – KITTA' MATANGKASA PAMMUJI 10 Bible Online

PAMMUJI 10 - Makassar Version – KITTA' MATANGKASA bible

PAMMUJI 10

¹Angngapa Kibella, o, Batara na Kiaccokko ri wattu kasukkarrang ikambe?

²Tampomi tu ja'dalaka anjallakkangi tu kasi-asia; boli'mi kamma nialle ke'nanga ri sikko' napare' kalenna.

³A'bicara borroi tu ja'dalaka untu' kaerokang ja'dala'na, tau angngoaya natunrai siagang natollaki Batara.

⁴Tu dorakaya tanajampangiai Batara, lanri tampona nanakana tena Allata'ala.

⁵Anjari ngaseng sikontu usahana tu ja'dalaka; tanaassengai yareka tanapahangai hukkunNa Batara na nacini' tuna sikontu balinna.

⁶Nakana lalang pa'mai'na, “Tena kulasia-sia, na sikontu jari-jariku sangkamma tu tena naja'dala'.”

⁷ Tulusu' mattunrana, anggaratta' siagang annipu, kana-kananna sangnging kabirisang siagang kaja'dallang.

⁸Acokkoi ri desa-desaya ero' ambunoi tau tenaya salana. Sanrapangi singa attayanga ri bokona rompo'-rompoka ammata-matai tau tenaya pakkullena. Naadangi tu kasi-asia ri tampa' sinoa, nabakkai nampa nare'resang a'lampa.

¹⁰A'dundui naung, sadia untu' ambakkai; natu'gurang taua siagang katerassang.

¹¹Nakana nawa-nawana, “Nakaluppaimi Allata'ala na taNajampangia; tulusu' tenamo nalaNacinikka'!”

¹²Ammenteng maKi', o, Batara, hukkungi tu ja'dalaka! Kiu'rangi tau nijallakkanga!

¹³Angngapa tu ja'dalaka natuli nahina Allata'ala na nakana talanihukkungai ri Allata'ala?

¹⁴Mingka iKatte Kiciniki; Kiparhatikangi kasusaanga siagang kasessanga, na Kituli sadia untu' annulung. Tu tenaya pakkullena napassareangi kalenna mae ri Katte, tuli Kitulungi tu kasi-asia.

¹⁵Kitepoki kakoasanna tu ja'dalaka siagang tu dorakaya; hukkungi ke'nanga lanri panggaukanna sa'genna jarra ke'nanga.

¹⁶Batara ammarenta sa'genna satunggu-tungguna; bansa-bansa tenaya namangngasseng ri Ia la'lanynyaki battu ri buttana.

¹⁷Batara, Kipilangngeri pappala' doanna tau tunaya na Kipakajarre' pa'mai'na ke'nanga.

¹⁸Ana' kukanga siagang tu nijallakkanga Kipattojengi parkarana, sollanna tenamo tau ampakamallaki ke'nanga.