Read Makassar Version – KITTA' MATANGKASA PAMMUJI 103 Bible Online

PAMMUJI 103 - Makassar Version – KITTA' MATANGKASA bible

PAMMUJI 103

¹Battu ri Daud. Pujimi Batara, he nyawaku, sikontu pa'maikku, pujimi areng matangkasa'Na.

²Pujimi Batara, he nyawaku, teako kaluppai sikontu kabajikanNa!

³Iami ampamopporangi sikontu dosanu, ampamollei sikontu garrinnu,

⁴Ia ampakabebasaki nyawanu battu ri kuburuka, assareko pangngamaseang alla'bi-la'bi.

⁵Ia ampassukkuki katallassannu siagang kabajikang, sa'gennu tanaallea toa sanrapang jangang-jangang rajawali.

⁶Napajappai Batara hukkunga siagang kaadelanga mae ri sikontu tau nijallakkanga.

⁷Napa'nyatai rancanaNa mae ri Musa na sikamma gau'-gau'Na mae ri bansa Israel.

⁸ Saba' mangngamaseangi na mangngarimangngi Batara, la'bu sa'bara' na alla'bi pangngamaseang.

⁹Tena Natuli angga'gara', siagang tena Natuli larro satunggu-tungguna.

¹⁰Tena Nahukkungki' simbattala'na dosata, yareka Nabalasakki' simbattala'na kasalanta.

¹¹Mingka antekamma tinggina langika battu ri buttaya, kammaminjo lompo pangngamaseanNa mae ri tau mappilangngeria.

¹²Antekamma bellana battu raya sa'genna kalau', kammaminjo bellana Napela' dosa-dosata.

¹³Sanrapang se're mangge mangngamaseang ri ana'-ana'na, kammaminjo Batara mangngamaseang ri tau mappilangngeria.

¹⁴Saba' Naassengi Batara angkana battu ri apaki' nipa'jari, Nau'rangi angkana poro limbu'bu' buttajaki' bawang.

¹⁵Sanrapangi ruku' bodona tallasa'na rupataua; a'bakkaki sanrapang bunga ri kokoa;

¹⁶lanynya'mi punna niiri' ri anging, manna tampa'na tena tommo naniassengi.

¹⁷Mingka tuli Nakamaseangi Batara tu mappilangngeria, tulusu' a'jarina kabajikanNa ri sikontu turungang,

¹⁸mae ri tau anna'galaka ri parjanjianNa, na tamamminraya anggaukangi parentaNa.

¹⁹Ammarentai Batara ri suruga, Ia Karaeng makoasa mae ri sikontu-kontuna.

²⁰Pujimi Batara, he malaeka'-malaeka' gammaraka, ampilangngeriai siagang anggaukangai parentaNa.

²¹Pujimi Batara, he sikontu apa niaka ri suruga, sikontu atanNa anggaukangai ero'Na.

²²Pujimi Batara, he sikontu apa nipa'jaria ri sikontu kakoasanNa. Pujimi Batara, he nyawaku!