Read Makassar Version – KITTA' MATANGKASA PAMMUJI 104 Bible Online

PAMMUJI 104 - Makassar Version – KITTA' MATANGKASA bible

PAMMUJI 104

¹Pujimi Batara, he nyawaku! Tamaka malompoTa iKatte, o, Batara Allata'alaku! AmmakeKi' pakeang kagammarrang siagang kala'birang,

²akkalimbukKi' cahaya. IKatte ampaka'rangi langika sanrapang kema,

³siagang ambangungi ballatTa ri tompo' je'neka ri langi'. Rammang-rammanga Kipa'jari kareta, ka'nyi'na anging Kidongkoki.

⁴ Anging Kipa'jari suroTa, na kila' a'jari palayanTa.

⁵Kijarreki Kitannang buttaya ri dasara'na, sa'genna tena nalata'lengga satunggu-tungguna.

⁶Kikalimbuki siagang tamparang lompo, ammantangi je'ne'na ri coppo'-coppo' buluka.

⁷Punna Kiga'gara', a'lo'loroki anjo je'neka, a'lo'loro' kancang lanri arrunna sa'ranTa.

⁸A'lo'loroki je'neka numalo ri moncong-moncong antama' ri ka'bung, ri tampa' le'baka Kipasadiangi.

⁹Kipattantui pa'baeng-baeng takkullea nalaloi, sollanna tena nammotere' ammantang ri bontoa.

¹⁰Kipanaiki je'ne' timbusenga ri sikamma ka'bunga, a'lo'loroki je'ne' kaloroka ri alla'na bulu'-buluka,

¹¹untu' assarei je'ne' inung sikontu olo'-oloka ri parang, napassau turerena sikamma keledai romanga.

¹²Appareki ru'mung jangang-janganga ri ampi'na; assa'ra-sa'ra ke'nanga ri alla'na leko'-leko' kayua.

¹³Battu ri langi' Kipaturung bosia ri moncong-monconga, rassi linoa siagang bate paretTa.

¹⁴Kipattimboi ruku'-rukuka untu' kanre olo'-olo', na sangka' rupa lamung-lamung untu' rupataua. Akkullei a'lamung-lamung,

¹⁵nappa'nia' wassele' je'ne' anggoro' appakasannanga. Kammayatompa minynya' zaitun ampa'jari accayai tanja'na, siagang kanre assareai ke'nanga kagassingang.

¹⁶Poko'-poko' kayuNa Batara anggappai bosi jai poko' camara Libanon nalamung kalennai.

¹⁷Anjoremmi a'ru'mung jangang-janganga, jangang-jangang ranggung a'ru'mung ri coppo'na.

¹⁸Moncong-moncong tinggia a'jari tampa'na bembe romang; palandu' accokko ri batu karanga.

¹⁹ApparekKi' bulang untu' pammatei wattu, naassengi alloa wattu pa'labuanna.

²⁰Punna Kipaturung sassanga, alloa a'jarimi bangngi, na sikontu olo'-olo' romanga a'lemere'mi.

²¹Singa-singa rungkaya ammarrammi amboyai apa lanakanrea, appala' kanre Napasadiaya Allata'ala.

²²Punna ammumba mataalloa, a'lilimi ke'nanga, mange anra'ba ri tampa' paccokkoanna.

²³Nampa assulu'mo rupataua untu' anggaukangi jama-jamanna, nanjama tulusu' sa'genna karueng.

²⁴Tamaka jaina bate paretTa, o, Batara, yangasenna Kipa'jari lanri bajitTa; rassi buttaya siagang bate paretTa.

²⁵Ciniki tamparang luara' takka'ranga, siagang apa-apa lompo ca'dia tanikulle nirekeng.

²⁶ Anjoremmi sikamma kappalaka asombala', siagang Lewiatan, naga tamparang bate paretTa, akkarek-karena.

²⁷Yangaseng ke'nanga iKatte narannuang, untu' anggappa kanre punna narapi' wattunna.

²⁸IKatte assare, nake'nanga ampa'rappungi, iKatte ampasadiai, nangnganre ke'nanga sa'genna sukku' nakasia'.

²⁹Punna a'gilingKi', mallaki ke'nanga; punna Kialle nappasa'na ke'nanga, possoki, nampa ammotere' a'jari limbu'bu' butta sangkamma riolo.

³⁰Mingka punna Kisare ke'nanga nappasa', nipa'jarimi ke'nanga; Kisarei katallassang beru linoa.

³¹Poro satunggu-tungguna kalompoanNa Batara! Poro rannui mae ri sikontu bate pa'jariNa!

³²Naciniki buttaya na'jari annekkere'mo buttaya, nasentoki moncong-monconga, sa'genna assulu' umbunna.

³³Erokka' akkelong mae ri Batara lalang tallasakku, akkelong pammuji mae ri Allata'alaku lalang niakku ija.

³⁴Poro anggappa pangngellai battu ri Ia kelong-kelongku, saba' Iami ampa'jari rannui pa'maikku.

³⁵Boli'mi kamma lanynya' battu ri lino tau dorakaya, boli'mi kamma cappu' posso' tau ja'dalaka. Pujimi Batara, he nyawaku! Pujimi Batara!