Read Makassar Version – KITTA' MATANGKASA PAMMUJI 105 Bible Online

PAMMUJI 105 - Makassar Version – KITTA' MATANGKASA bible

PAMMUJI 105

¹Sukkurukko mae ri Batara, kabarrangi kalompoanNa, caritai panggaukanNa mae ri bansa-bansaya.

²Akkelongko kelong pammuji mae ri Batara, kabarrangi sikontu bate pare'Na appakalannasaka.

³Iami Batara Kaminang Matangkasaka; rannu mako saba' Ia ampatangki' sikontu anynyombaya siratang rannu.

⁴Appalakko kagassingang battu ri Ia, tuli sombai.

⁵He, turunganna Abraham, atanNa, siagang turunganna Yakub tunipileNa, u'rangi sikontu gau' appakalannasa' sikontu le'baka Nagaukang, teako kaluppai sikamma kaputusanNa.

⁷Batarami Allata'alata, kaputusanNa Napabattui ri sikontu linoa.

⁸Tuli Nau'ranginna parjanjianNa, tappakei janjinNa satunggu-tungguna.

⁹ Anjo parjanjianNa Napareki siagang Abraham, nampa mae ri Ishak;

¹⁰ nampa nipakajarre' siagang Yakub, a'jari parjanjiang mannannungang mae ri umma' Israel.

¹¹Nakana, “Butta Kanaan laKupassareangi mae ri kau, a'jari pisaka nupatanga.”

¹²Riolo sangkamma tubattu-battu umma'Na Allata'ala anjoreng tena nasiapa jaina ke'nanga.

¹³A'labaki' ke'nanga battu ri pa'rasangang se'rea mae ri pa'rasangang maraeng.

¹⁴ Mingka tena Nalappassangi Batara manna inai anjallakkangi ke'nanga; Napakaingaki sikamma karaenga lanri ke'nanga, Nakana,

¹⁵“Teako ganggui tunipileKu, teako a'gau' ja'dalli mae ri na'bi-na'biKu!”

¹⁶ Napabattui Batara kacipuranga ri anjo pa'rasanganga, na Naalle sikontu parsadiaang kanrea.

¹⁷ Mingka Napajappa rioloi sitau ri dallekanna ke'nanga, Yusuf, le'baka nabalukang ke'nanga a'jari ata.

¹⁸ Nisikkoki rante bangkenna, nasarei kallonna rante bassi.

¹⁹Kale'bakkanna kajariammi apa le'baka nitappu riolo, nipattojeng ri kananNa Batara.

²⁰ Nampa karaeng Mesir, koasaya ri bansa-bansaya, napakabebasaki battu ri tarungkua.

²¹ Nisaremi tugasa' angngurusuki balla' lompona karaenga, nisarei koasa mae ri sikontu barang-baranna;

²²kammayatompa koasa untu' angngatoroki sikamma pagawena karaenga, siagang ampimpingi sikamma tutoa-toaya.

²³ Nampa a'lampamo Yakub mange ri Mesir nammantang tuli anjoreng salaku tubattu-battu.

²⁴ Napa'jari Batara pila' katambang jaina umma'Na, sa'genna la'bi kassa'mi nabalinna.

²⁵Napinrai pa'mai'na tu Mesir sa'genna birisi' ri umma'Na na nagau' jekkommo ke'nanga sikamma ata-atanNa.

²⁶ Nampa Nasuro Musa atanNa siagang Harun tunipileNa.

²⁷Ri Mesir Nagaukangi ke'nanga gau' appakalannasaka, gau'-gau' malompo battua ri Batara,

²⁸ na mannuruki ke'nanga ri parentaNa. Nampa Napa'jari sassang makkappu' Batara anjo pa'rasanganga.

²⁹ Napinrai binangana ke'nanga a'jari cera', sa'genna panra' ngaseng juku'na.

³⁰ A'lemere'mi tumpanga ri pa'rasanganna ke'nanga, ba'lalo antamaki ri balla' lompona karaenga.

³¹ Lanri parentaNa Allata'ala battumi katingaloa, siagang sikamma lamuka angkatulungi anjo sikontu pa'rasanganga.

³² Napaturummi es batua sambe bosi, Napabattui kila' akkila'-kilaka.

³³Narumbangi poko' anggoroka siagang poko' araya, Napara'bai sikontu poko'-poko'na ke'nanga.

³⁴ Lanri parentaNa, battui katimbanga, teai sipato' jaina, takkulleai nirekeng jaina.

³⁵Napaccappuki sikontu lamung-lamunga ri kokoa, nakanre sa'genna la'busu' wassele'na buttaya.

³⁶ Nampa nabuno ngaseng sikontu ana' bura'ne toaya lalang sikontu kaluargana tu Mesir.

³⁷ Nampa Naantara' bansa Israel assulu', angngerangi ke'nanga pera' siagang bulaeng; yangasenna baji' ngaseng tubuna siagang gassing.

³⁸Tu Mesir nitujui ri malla' siagang malla' lompo, jari sannammi ke'nanga a'lampana tu Israel.

³⁹ Naka'rangi Batara rammanga untu' alla'langi umma'Na, siagang pepe' untu' ansingari ke'nanga ri wattu bangngi.

⁴⁰ Appalaki ke'nanga, nampa nipabattu jangang-jangang kurammua, Nasarei ke'nanga roti battu ri suruga sa'genna bassoro'.

⁴¹ Nareppeki moncong batua, nampa assulu' je'neka assolong sangkamma je'ne' ri parang lompoa.

⁴²Saba' Nau'rangi Batara janjinNa mae ri Abraham, atanNa.

⁴³Nampa naantara' umma'Na siagang rannu, tunipileNa siagang makkio' rannu.

⁴⁴ Buttana bansa-bansaya Nasareangi ke'nanga, koko-kokonna ke'nanga Napa'jari umma'Na pata,

⁴⁵sollanna mannuruki anjo umma'Na ri hukkung-hukkunNa na napinawang parenta-parentaNa. Nipujimi Batara!