Read Makassar Version – KITTA' MATANGKASA PAMMUJI 106 Bible Online

PAMMUJI 106 - Makassar Version – KITTA' MATANGKASA bible

PAMMUJI 106

¹ Pujimi Batara! Sukkurukko mae ri Batara, saba' bajiki; pangngamaseanNa sa'genna satunggu-tungguna.

²Inai akkulle angkabarrangi kaporeanNa Batara, siagang assare pammuji siratanga mae ri Ia?

³Mate'nei tau mannurukia ri parenta-parentaNa, siagang tuli annabaya lalang tindakanna.

⁴Kiu'rangia', o, Batara, lanri kabajikanTa mae ri ummatTa, Kitulung tonga' punna Kipasalama' ke'nanga.

⁵Poro kucini' tollalo kacopponganna tunipileTa siagang a'rannu-rannu siagang ummatTa. Poro lompo todong pa'maikku siagang rannu siagang sikamma tua'jaria Kipatang.

⁶Dorakami ikambe sangkamma boe-boena ikambe; a'gau' ja'dala'mi siagang dorakami ikambe.

⁷ Wattunna ri Mesir tena napahangi boe-boena ikambe; tanapahangai bate pare' malompoTa. Nakaluppai pangngamaseang alla'biTa, ri ampi'na Tamparang Alara' angngewai ke'nanga mae ri Kaminang Tinggia.

⁸Mingka Batara Napasalamaki ke'nanga lanri kalenna tonji, sollanna a'jari a'nyata kaporeanNa.

⁹ Lanri parentaNa na'jari kalotoro' Tamparang Alara', Ia angngerangi umma'Na a'jappa numalo ri tamparang, sanrapang numalo ri parang lompoa.

¹⁰Lanri kammana Napasalama'mi ke'nanga battu ri limanna musua, Napakabebasa' battu ri koasana balinna.

¹¹Mingka je'neka natallangngangi balinna ke'nanga; manna sitau tania' ammantang.

¹² Nampa tappa'mo umma'Na mae ri janjinNa nakkelommo kelong pammuji mae ri Ia.

¹³Mingka linta'mi nakaluppai ke'nanga apa le'baka Nagaukang Batara siagang anggaukang apa-apa tamappala' tangara'Na.

¹⁴ Ri parang lompoa nigodami ke'nanga ri napasuna, na naso'ri Allata'ala.

¹⁵Nasarei apa napalaka ke'nanga, mingka Napitujui tongi ke'nanga garring.

¹⁶ Angngiri matai ri Musa ke'nanga ri parang lompoa siagang mae ri Harun ata matangkasa'Na.

¹⁷Nampa ta'bage ruamo buttaya angnga'luki Datan, antongkoki Abiram siagang kaluargana.

¹⁸Turungi pepeka antamberoi kalompo'na ke'nanga, ampakamutungi sikontu tau dorakaya.

¹⁹ Ri Moncong Sinai appareki ke'nanga patung ana' sapi bulaeng, nampa nasomba anjo patung napareka ke'nanga.

²⁰Nasambei Allata'ala malompoa siagang patung sapi pakanre rukuka.

²¹Nakaluppai ke'nanga Allata'ala Mappasalama'na ke'nanga le'baka anggaukangi gau'-gau' malompoa ri Mesir.

²²Tamaka lompona apa-apa le'baka Nagaukang ri anjo pa'rasanganga, appakalannasaki tindakanna ri Tamparang Alara'.

²³Jari ero'mi Allata'ala ampossoki umma'Na, mingka nipisangkai ri Musa, tunipileNa. Musa a'jari antangngai ke'nanga, sa'genna naung larroNa Allata'ala.

²⁴ Nampa natolla' ke'nanga anjo pa'rasangang ga'gaya lanri tena natappa' ri janjinNa Allata'ala.

²⁵A'moro-moroi ke'nanga lalang ri kemana nataeroka ampilangngeri sa'ranNa Batara.

²⁶Jari assumpami Na'janji angkana laNabunoi ke'nanga ri parang lompoa.

²⁷ Turunganna ke'nanga laNapelaki ri alla'na bansa-bansaya siagang laNapasisa'la'-sa'laki ke'nanga ri pa'rasangang maraeng.

²⁸ Nampa anynyomba Baal ke'nanga ri Peor, na nakanre kanre nipassareanga mae ri rewata-rewataya.

²⁹Anjo panggaukanna ke'nanga napanaiki larroNa Batara, sa'genna nipitujui ke'nanga ri garring appakamallaka.

³⁰Mingka ambangummi Pinehas anghukkungi tau salaya, nammarimo anjo garringa.

³¹Anjo panggaukanna nabilang amalaki ri kalenna, siagang niu'rangi satunggu-tungguna.

³² Ri bungung-bungung Meriba napakanassui ke'nanga Batara, napakasusai Musa lanri panggaukanna ke'nanga.

³³Napa'jari lussaki ke'nanga atinna Musa, sa'genna tenamo nappikkiri' nampa a'bicara.

³⁴ Bansa-bansa maraenga tena naballassi ke'nanga, sangkamma Naparentakanga Batara.

³⁵Ba'lalo sibengkoro'mi ke'nanga siagang anjo bansa-bansaya, na naturuki cara tallasa'na tau tenaya naassengi Allata'ala.

³⁶Nampa anynyomba ke'nanga ri barhala-barhalaya, na iaminjo saba' karuntunganna ke'nanga.

³⁷ Nakoro'bangkangi ana'-ana'na ke'nanga mae ri barhala-barhala Kanaan.

³⁸ Napassolongi cera'na tau tenaya nasala, cera'na ana'-ana' kalenna ke'nanga, untu' nikoro'bangkang mae ri barhala-barhala; sa'genna nara'massi ke'nanga anjo pa'rasanganga.

³⁹Lanri anjo sikamma panggaukanna a'jari ra'masa'mi ke'nanga, siagang tajarreka ke'nanga mae ri Allata'ala.

⁴⁰ Nampa a'rinramo larroNa Batara mae ri ke'nanga, ero'mi ta'langnge Nasa'ring lanri umma'Na tonji.

⁴¹Jari Napassareammi ke'nanga mae ri bansa-bansaya, Nabalang parekangi ke'nanga nikoasai ri musu.

⁴²Nampa nijallakkang ke'nanga ri musu-musunna ke'nanga, nipatundu' rawa ri kakoasanna ke'nanga.

⁴³A'mole-molei nipakabebasa' ke'nanga ri Batara, mingka la'bi nangai ke'nanga angngewa, sa'genna posso' ke'nanga lalang dosa-dosana ke'nanga.

⁴⁴Mingka Napilangngeri Batara pakkio'na ke'nanga, Naparhatikangi kasusaanna ke'nanga.

⁴⁵Lanri ke'nanga nau'rangi parjanjianNa Nakarimangngi ke'nanga lanri pangngamaseang malompoNa.

⁴⁶Napa'jarimi ke'nanga nikamaseang ri sikontu bansa antahangai ke'nanga.

⁴⁷ Kipasalamaki ikambe, o Karaeng Allata'alana ikambe, Kipa'rappungi ikambe battu ri alla'na bansa-bansaya, sollanna akkulle ikambe appala' sukkuru' siagang mammuji ri areng matangkasatTa.

⁴⁸Pujimi Batara, Allata'alana Israel, anne kamma siagang satunggu-tungguna. Boli'mi kamma yangaseng taua angkana, “Aming!” Pujimi Batara!