Read Makassar Version – KITTA' MATANGKASA PAMMUJI 107 Bible Online

PAMMUJI 107 - Makassar Version – KITTA' MATANGKASA bible

PAMMUJI 107

¹ “Sukkurukko mae ri Batara saba' Ia bajiki, pangngamaseanNa sa'genna satunggu-tungguna.”

²Pau ma'mole-molei anjo kammaya, he ikau le'baka nipasalama' battu ri kasusaanga.

³Le'ba' mako Napa'rappungang battu pa'rasangang-pa'rasangang maraeng, battu raya siagang ilau', battu wara' siagang timboro'.

⁴Nia' a'la'bang mange-mange ri parang lompoa, tanaassenga oloang mange ri pammantangnganga ri kotaya.

⁵Naallei cipuru' siagang turere ke'nanga na tappela' ngaseng sikontu pa'minasana.

⁶Lalang kasusaanna akkioki ke'nanga mae ri Batara, na nipakabebasa'mo ke'nanga battu ri kasukkaranga.

⁷Naului ke'nanga ri oloang lambusuka mange ri tampa' pammantangnganga ri kotaya.

⁸Siratangi ke'nanga appala' sukkuru' ri Batara lanri pangngamaseanNa, lanri sikamma bate pare' malompoNa mae ri rupataua.

⁹Saba' Napassaui turerena tau turerea, napila'bi-la'bi tau cipuruka siagang sikontu apa bajika.

¹⁰Nia'mo ammantang lalang ri kasassangnganga, tau sessaya nitahang lalang rante bassia,

¹¹saba' angngewai ke'nanga mae ri Allata'ala siagang tena najampangi parentaNa Kaminang Tinggia.

¹²Nalicaki pa'mai'na ke'nanga lanri nasarena anjama battala'; tu'guruki ke'nanga natena antulungi.

¹³Lalang kasusaanna ke'nanga akkioki mae ri Batara, na nipakabebasa'mo ke'nanga ri Ia battu ri kasukkaranga.

¹⁴Naerangi ke'nanga assulu' battu ri kasassangnganga, nampa Natepo' rante bassi passikko'na ke'nanga.

¹⁵Siratangi ke'nanga appala' sukkuru' ri Batara lanri pangngamaseanNa, lanri sikamma bate pare' malompoNa mae ri rupataua.

¹⁶Saba' narumbangi pakke'bu'-pakke'bu' tambagaya, siagang nalicaki sikamma panjoli bassia.

¹⁷Nia' dongo' siagang sessa lanri dosa-dosana ke'nanga, siagang nisessai lanri kasalanna ke'nanga.

¹⁸Eroki ta'langnge nasa'ring ke'nanga mae ri sikamma kanrea, a'reppese'mi a'jala'na ke'nanga.

¹⁹Lalang kasusaanna akkioki ke'nanga mae ri Batara, na Napakabebasa' ke'nanga battu ri kasukkaranga.

²⁰Napammollei ke'nanga siagang parentaNa, na Nalappassang ke'nanga battu ri kali'bong kuburuka.

²¹Siratangi ke'nanga appala' sukkuru' ri Batara lanri pangngamaseanNa, lanri sikamma bate pare' malompoNa mae ri rupataua.

²²Boli'mi kamma appala' sukkuru' ke'nanga angngerang passare, na nakabarrang panggaukanNa siagang kelong-kelong marannu.

²³Nia' todong ansombali tamparanga siagang kappala', untu' a'boya katallassang ri tamparang luaraka.

²⁴Naciniki ke'nanga sikamma panggaukanNa Batara, bate pare' appakalannasa'Na ri tamparanga.

²⁵Lanri parentaNa nammiri' anging puttusuka Napabattu bombang-bombang lompoa.

²⁶Taangkaki tinggi-tinggi nai' sikamma kappalaka, nampa napatappasa' naung ri dasara'na tamparang lompoa. Tappela' ngasemmi kabaranianna taua andallekangi bahaya lompo kammaya.

²⁷Dangngala'mi ulunna ke'nanga ta'royong-royong sanrapang tau nasa'ring siagang tau takkaluppaya.

²⁸Lalang kasusaanna ke'nanga akkioki mae ri Batara, na Ia ampakabebasaki ke'nanga battu ri kasukkaranga.

²⁹Anging puttusu' a'jalloka Nasuroi sannang, nasannammo bombanga.

³⁰Sannammi ke'nanga saba' allalomi anging lompoa; Naerammi ke'nanga mange ri pa'labuang natujua ke'nanga.

³¹Siratangi ke'nanga appala' sukkuru' ri Batara lanri pangngamaseanNa, lanri sikamma bate pare' malompoNa mae ri rupataua.

³²Napa'la'bangi ke'nanga kalompoanNa Batara ri tangngana umma'Na, siagang mammuji ri Ia lalang ri pa'rappunganna tutoa-toaya.

³³Sikamma binangaya Napinrai a'jari parang timbuseng je'neka Napa'jari butta kalotoro'.

³⁴Butta copponga Napa'jari parang ce'la buttana, lanri kaja'dallanna sikamma pandudu'na.

³⁵Parang lompoa Napinrai a'jari kollang je'ne' butta kalotoroka Napa'jari timbuseng je'ne'.

³⁶Tau cipuruka Naboli' anjoreng; ambangungi kota untu' pammantanganna ke'nanga.

³⁷Nakiori koko-kokonna ke'nanga na'lamung poko' anggoro', nampa napasse're wassele'na sanna' jaina.

³⁸Nisarei ri Batara ke'nanga jai ana', siagang olo'-olo' piarana ke'nanga pila' a'bija-bijai.

³⁹Mingka nibetai ke'nanga na sike'de' mami ammantang lanri sessana siagang panjallakkang pallaka.

⁴⁰Nipakatunai ri Batara sikamma pamarentana ke'nanga, na nisuro ke'nanga a'la'bang a'lampa ri parang lompoa ia tenaya oloanna.

⁴¹Mingka tu kasi-asia nipakabebasaki battu ri kasusaanna ke'nanga, pila' katambangi kaluargana ke'nanga sanrapang gimbala' jaina.

⁴²Niciniki ri tau lambusuka na rannu, mingka tau ja'dalaka nitongkoki bawana.

⁴³Poro tau bajika nawa-nawana napikkiriki sikamma anjo passalaka siagang namangakui angkanaya tulusu' mangngamaseanNa Batara.