Read Makassar Version – KITTA' MATANGKASA PAMMUJI 108 Bible Online

PAMMUJI 108 - Makassar Version – KITTA' MATANGKASA bible

PAMMUJI 108

¹Kelong-kelong. Pammujina Daud.

² Majarreki tappakku, o, Allata'ala, erokka' akkelong siagang mammuji mae ri Katte. He ambangungko, nyawaku!

³He ambangungko, gambusu' siagang kacapi! Erokka' ampabangungi bari'basaka.

⁴O, Batara, erokka' appala' sukkuru' mae ri Katte ri alla'na bansa-bansaya. Erokka' akkelong kelong pammuji mae ri Katte ri alla'na umma' rupataua.

⁵Saba' pangngamaseang lompoTa narapiki langika siagang nyawa tamamminraTa sa'genna rammanga.

⁶O, Allata'ala, Kipappicinikangi kalompoanTa ri langi', siagang kala'biranTa ri sikontu linoa.

⁷ Kipasalamaki ikambe siagang koasaTa, Kipilangngeri pappala' doanna ikambe, sollanna nipasalama' sikamma tau Kikamaseanga.

⁸Battu ri pammantangang matangkasa'Na Nakana Allata'ala, “ErokKa' akkio' rannu na Kubage-bage butta Sikhem, ka'bung Sukot laKugoccangi nomoroka.

⁹Gilead siagang Manasye iNakke pata, Efraim topi bajaKu, siagang Yehuda takkang kakaraengangKu.

¹⁰Mingka Moab iami tampa' pa'bissang bangkengKu; akkio' rannuA' ammeta mae ri Filistea. Mae ri Edom Kupasambila pa'lapa' bangkengKu, a'jari tanra angkana iNakke ampatangi.”

¹¹Inai langngeranga' mange ri Edom? Inai lanrurunganga' mange ri anjo kota pattahangnganga?

¹²O, Allata'ala, tenaka Kimminawang siagang ikambe? Tenaka Kimaju siagang tantarana ikambe?

¹³Kitulungi ikambe mae ri musua, saba' tena matu-matunna bantuanna rupataua.

¹⁴Labaraniki' punna Narurungangki' Allata'ala; Iami ambetai musunta.