Read Makassar Version – KITTA' MATANGKASA PAMMUJI 115 Bible Online

PAMMUJI 115 - Makassar Version – KITTA' MATANGKASA bible

PAMMUJI 115

¹Teai ikambe, o, Batara, teai ikambe, mingka iKatteji musti nipuji, saba' iKatte tamamminraya siagang tuli mangngamaseang.

²Angngapai bansa-bansaya namusti angkana, “Kemae Allata'alana ke'nanga?”

³Allata'alata niaki ri suruga, Nagaukangi apa Nakaerokia.

⁴ Barhalana ke'nanga battu ri bulaeng siagang pera' nipare', bate pare' limanna ke'nanga.

⁵Nia' bawana mingka takkulleai a'bicara, nia' matanna, mingka taccinikai.

⁶Nia' tolinna, mingka takkulleai allangngere', nia' ka'murunna, mingka takkulleai angngara'.

⁷Nia' limanna, mingka takkulleai anna'gala', nia' bangkenna, mingka takkulleai a'jappa, tena sa'ra assulu' battu ri karro'-karro'na.

⁸Poro kamma tomminjo sarenna sikamma tau amparekai, siagang sikamma tau tappaka mae ri ia.

⁹He Israel, manrannuangko mae ri Batara, Iami antulungko siagang anjagaiko.

¹⁰He sikamma imang, manrannuangko mae ri Batara, Iami antulungko siagang anjagaiko.

¹¹He sikamma tau mappilangngeria, manrannuangko mae ri Batara, Iami antulungko siagang anjagaiko.

¹²Mangngu'rangi Batara mae ri katte siagang laNabarakkakiki', laNabarakkaki umma' Israel siagang sikontu imang turunganna Harun.

¹³ LaNabarakkaki sikamma tau mappilangngeria, baji' tau ca'di kammayatompa lompoa.

¹⁴Poro Napassareangi Batara jai ana' mae ri kau ngaseng siagang turungannu.

¹⁵Poro nibarakkakiko ri Batara, ampa'jariai langika siagang buttaya!

¹⁶Langika iamintu Bataraji bawang pata, mingka buttaya Napassareangi mae ri rupataua.

¹⁷Tena nipuji Batara ri tau matea, ri tau naungamo ri tampa' sinoa.

¹⁸Mingka ikatte attallasaka appala' sukkurukki' mae ri Ia, anne kamma siagang satunggu-tungguna. Pujimi Batara!