Read Makassar Version – KITTA' MATANGKASA PAMMUJI 116 Bible Online

PAMMUJI 116 - Makassar Version – KITTA' MATANGKASA bible

PAMMUJI 116

¹Mangngaia' ri Batara, saba' Napilangngeria' na Naparhatikang pappalakku.

²Napilangngeria', kere-kere wattu nakukkio' mae ri Ia.

³Lanatujua' bahaya kamateang; bala lompona kamateanga nabakkaia', kunapa'jari lussa' siagang malla'.

⁴Jari akkio'ma' mae ri Batara, angkana, “O, Batara, kupalaki, naKipasalamaka'!”

⁵Anjo Batara mangngamaseangi siagang adeleki; Allata'alata la'bi ri pangngamaseang.

⁶Naparakai Batara sikamma tau biasaya; wattunna tena pakkulleku Ia ampasalamaka'.

⁷Kupakasannangi pa'maikku, saba' bajiki Batara mae ri nakke.

⁸Napata'lappasa'ma' Batara battu ri kamateanga; Nasaleoria' siagang tena Nalappassanga' tu'guru'.

⁹Jari akkullemi kukasia' tallasaka ri anne linoa, lalang pa'la'langanNa Batara.

¹⁰ Tuli tappaka', manna kukana mamo, “Sanna' bateku nijallakkang.”

¹¹Lalang kalinguangku nakukana, “Tena manna sitau akkulle nipatappa'.”

¹²Apa kupassareang mae ri Batara untu' ambalasaki kabajikanNa mae ri nakke?

¹³Erokka' angngerang passare anggoro' mae ri Batara untu' angkasukkurangi pannulunNa.

¹⁴Lakurupai janjingku ri Ia ri dallekanna sikontu umma'Na.

¹⁵Tamaka manynyayanNa Batara ri kamateanna se're tunikamaseanna.

¹⁶Inakke anne atanTa, o, Batara, sanrapang ammakku, anynyomba tonga' mae ri Katte Kilappassamma' battu ri tahananga.

¹⁷Langngeranga' koro'bang sukkuru' mae ri Katte, nakuappanai' pappala' doang mae ri Katte.

¹⁸Lakurupai janjingku mae ri Batara, ri dallekanna sikontu umma'Na

¹⁹a'rappunganga lalang ri paranglakkeng Balla'Na Batara, ri tangnga kotana Yerusalem. Nipujimi Batara!