Read Makassar Version – KITTA' MATANGKASA PAMMUJI 118 Bible Online

PAMMUJI 118 - Makassar Version – KITTA' MATANGKASA bible

PAMMUJI 118

¹ Sukkurukko mae ri Batara lanri Ia bajiki, pangngamaseanNa sa'genna satunggu-tungguna.

²Siratangi tu Israel angkana, “PangngamaseanNa sa'genna satunggu-tungguna.”

³Siratangi sikamma imanga angkana, “PangngamaseanNa sa'genna satunggu-tungguna.”

⁴Siratangi sikontu tau mappilangngeria angkana, “PangngamaseanNa sa'genna satunggu-tungguna.”

⁵Lalang kasukkarangku akkioka' mae ri Batara; nampa appiali na Nalappassanga'.

⁶ Tena kumalla' lanri Narurunganga' Batara, tena pakkullena rupataua mae ri nakke.

⁷Narurunganga' Batara untu' antulunga', lakuciniki musungku nibeta.

⁸Bajikangngangi a'la'langa mae ri Batara, kala manrannuanga mae ri rupataua.

⁹Bajikangngangi a'la'langa mae ri Batara, kala manrannuanga mae ri bija karaenga.

¹⁰Jai musu angkulilingia'; lanri koasaNa Batara, kubetai ke'nanga.

¹¹Natammulilia' ke'nanga battu ri kere-keremae; lanri koasaNa Batara, kubetai ke'nanga.

¹²Sanrapangi cani' ke'nanga angkatulunga'; lanri koasaNa Batara, kubetai ke'nanga. Lalang sipakkida mataji bawang nibuno ke'nanga sanrapang pepe' angkanrei rompo' akkatintinga.

¹³Teai sipato' bateku nibakkai na sike'de' mami kutu'guru', mingka Natulunga' Batara.

¹⁴ Batara kagassingangku siagang panynyombangku, Iami le'ba' ampasalamaka'.

¹⁵Pilangngerimi pakkio' rannu ammetana ri kema-kemana umma'Na, “Nagaukangi Batara gau' malompoa!

¹⁶KoasaNa Batara assareki' pammetang! Nagaukangi Batara gau' malompoa.”

¹⁷Tena kulamate, mingka tuli lattallasakka' untu' ankabarrangi bate pare'Na Batara.

¹⁸Le'baka' nasessa terasa' Batara, mingka tena Napassareanga' mae ri kamateanga.

¹⁹Sungkeanga' pakke'bu' lompona Balla'Na Batara, sollangku antama' siagang appala' sukkuru' ri Ia.

²⁰Iaminne pakke'bu' lompoNa Batara, tau lambusuka bawang akkulle numalo.

²¹Mammujia' mae ri Katte, saba' Kiturukianga' pappalakku; Kisarema' pammetang.

²² Batu nipelaka ri tukang-tukang bangunanga, a'jari batu tangnga.

²³Iaminjo gau'Na Batara, tamaka malompona mae ri katte.

²⁴Iaminne allo Napattantua Batara; umba nanipakalompoi siagang rannu.

²⁵ Napalaki ikambe, o, Batara, Kipasalamaki ikambe, o, Batara, Kisarei ikambe pammetang!

²⁶ Nibarakkakimi niaka battu lalang arenNa Batara, nibarakkakiko ri kambe battu ri Balla'Na Batara.

²⁷Batarami Allata'ala, malammoro' pa'maiki mae ri katte. Maju mako a'barrisi' siagang tangke kayu ri limannu, siagang kulilingi tampa' pakkoro'bangnganNa Batara.

²⁸IKatte Allata'alaku, appala' sukkurukka' mae ri Katte, Allata'alaku, kupakalompoKi'.

²⁹Sukkurukko mae ri Batara, saba' Ia bajiki, pangngamaseanNa sa'genna satunggu-tungguna.