Read Makassar Version – KITTA' MATANGKASA PAMMUJI 119 Bible Online

PAMMUJI 119 - Makassar Version – KITTA' MATANGKASA bible

PAMMUJI 119

¹Mate'nei tau tenaya callanna lalang tallasa'na siagang mannurukia ri hukkunNa Batara.

²Mate'nei tau anturukiai parentaNa, siagang sibatu pa'mai'na usaha angngassengi Batara.

³Mate'nei tau attallasaka situru' ero'Na Batara, siagang tenaya nagaukangi kaja'dallanga.

⁴Kisarei ikambe hukkunTa, o, Batara, sollanna nagaukang ikambe siagang pa'mai' tamamminra.

⁵Poro inakke siagang pa'mai' majarre' anturuki paratorang-paratoranTa.

⁶Punna kuparhatikang sikontu parentaTa, tenamo kulanipakasiri'.

⁷Punna kupilajari kaputusang adeletTa, mammujia' mae ri Katte situlusu' pa'maikku.

⁸Erokka' mannuruki ri hukkunTa, tea sikaliKi' a'lampai ambokoia'.

⁹Tau rungkaya akkullei najagai tallasa'na natena callanna punna attallasaki situru' parentaTa.

¹⁰Lalang sibatu pa'maikku kuusahai angngassengKi', teaKi' lappassangngia' andakkai parentaTa.

¹¹Kuboliki ri pa'maikku pangngajaratTa, sollanna tena kudoraka mae ri Katte.

¹²Mammujia' mae ri Katte, o, Batara, Kiajarakka' ri katantuanTa.

¹³Kulompoi sa'rangku ampappiassengangi sikontu hukkung Kipassareanga.

¹⁴Rannua' anturuki parenta-parentaTa, sanrapang kupatang ngaseng sikamma apa-apaya.

¹⁵Erokka' ampilajari sikontu kaputusanTa, siagang amparhatikangi sikamma pitunju'-pitunjutTa.

¹⁶A'jari sannangi pa'maikku lanri katantuanTa; tena nalakukaluppai ajaranTa.

¹⁷Poro lammoro' pa'maikKi' mae ri anne atanTa, sollangku tuli attallasa' na kumannuruki ri ajaranTa.

¹⁸Kisungkei matangku sollangku accini' ajarang malompo niaka lalang ri hukkunTa.

¹⁹Poro sinampe'ja' bawang lammantang ri lino, teaKi' cokkoi hukkunTa mae ri nakke.

²⁰Pa'risiki pa'maikku napakamma nakku', sikontuna wattu erokka' angngassengi hukkunTa.

²¹Kikalarroi tau borroa, naKitunrai tau andakkaiyai parentaTa.

²²Kilappassanga' battu ri panghinaanna siagang paccallana ke'nanga, saba' inakke kugaukangi paratoranTa.

²³Manna nasikongkolo' sikamma pamarentaya ambalianga', anne atanTa lananawa-nawai katantuanTa.

²⁴Paratorang-paratoranTa a'jari pappakaingakku ia ampakasannangi pa'maikku.

²⁵Attinroa' lalang ri limbu'buka; Kipammollei tallasakku situru' janjinTa.

²⁶Kumangakui panggaukangku, nampa appialimaKi' ri nakke; Kiajaria' katantuanTa.

²⁷Kitulunga' untu' ampahangi hukkung-hukkunTa, ajarang malompoTa lakunawa-nawai.

²⁸Ancuru' dudui nyawaku natuju kasusaang, Kipakajarreka' situru' janjinTa.

²⁹Kipakabella' battu ri oloang salaya, lanri kabajikanTa, ajarakka' hukkunTa.

³⁰Kupileimi lamannurukia, tuli kuu'rangi parentaTa.

³¹Kuturukimi sikamma paratoranTa, o, Batara, teaKi' balang parekangia' nipakasiri'.

³²Lamannurukia' ri parentaTa siagang sannang pa'mai', saba' iKatte ampa'jaria' la'bi pahang.

³³O, Batara, ajarakka' battuanna sikamma katantuanTa, sollangku mannuruki sa'genna kala'busang.

³⁴Kipa'jari pahanga' ri hukkunTa sollanna kuturuki, siagang kugaukang siagang sibatu pa'maikku.

³⁵Poro manna'gala' jarreka' mae ri parentaTa, lanri iaminjo pangngaingku.

³⁶Kisarea' kacinnang untu' mannuruki ri paratoranTa, la'biangngang na cinnaya a'jari kalumanynyang.

³⁷Kijagaia' sollanna tena kuondangi apa tenaya matu-matunna, Kisarea' tallasa' situruka erotTa.

³⁸Kipakajarreki janjinTa mae ri anne atanTa, Kipassareanga mae ri tau mannurukia mae ri Katte.

³⁹Kipakabellai panghinaang kukamallakkanga, lanri tamaka baji'na hukkunTa.

⁴⁰Kisarea' katallassang beru, saba' iKatte adelekKi', inakke cinna' mannuruki ri sikamma kaputusanTa.

⁴¹O, Batara, Kipicinikianga' antekamma mangngamaseanTa ri nakke, Kipasalamaka' situru' siagang janjinTa.

⁴²Nakukkulle appiali ri tau anghinaya', saba' kana-kananTa panrannuangku.

⁴³Kitulunga' untu' tulusu' ampaui annabaya, saba' manrannuanga' mae ri kaputusanTa.

⁴⁴Erokka' anna'gala' ri hukkunTa, sa'genna satunggu-tungguna.

⁴⁵Nakulabebasa' lalang tallasakku, lanri usahaku anturuki ajaranTa.

⁴⁶Lakukabarrangi paratoranTa mae ri sikamma karaenga, na tena kulanipakasiri'.

⁴⁷Kasannangangku iamintu anggaukangi parentaTa, saba' mangngaia' ri ia.

⁴⁸Kupakala'biriki siagang kungai parentaTa, kunawa-nawai katantuanTa.

⁴⁹Kiu'rangi laloi janjinTa mae ri anne atanTa, janji assarea panrannuang mae ri nakke.

⁵⁰Iaminne ansaleoria' lalang ri pa'risikku, angkanaya anjo janjinTa assarea' tallasa'.

⁵¹Tau borroa sanna' nahinaTa, mingka inakke tena nakudakkai hukkunTa.

⁵²Kuu'rangi hukkunTa niaka battu riolo dudu, na nisaleorimo pa'maikku, o, Batara.

⁵³Sanna' larroku mae ri tau ja'dalaka, lanri nabokoi hukkunTa.

⁵⁴Lalang tallasakku sinampeka ri anne linoa, katantuanTa kupa'jari kelong-kelong pammuji.

⁵⁵Ri wattunna bangngi mangngu'rangia' mae ri Katte, o Batara, tuli kuta'gala'na hukkunTa.

⁵⁶Anggappa' kate'neang lalang mannurukingku ri sikamma parentaTa.

⁵⁷Ikatteji bawang kukacinnai, o, Batara, a'janjia' langgaukangi ajaranTa.

⁵⁸Sibatu pa'maikku appala' pangngamaseanTa Kikamaseang laloa' situru' janjinTa.

⁵⁹Le'ba'mi kunawa-nawa panggaukangku, na kua'janjimo lamannuruki ri paratoranTa.

⁶⁰Akkaro-karoma' siagang tenamo kuttayang untu' anggaukangi parentaTa.

⁶¹Tau ja'dalaka natannangngia' sikko', mingka tena kukaluppai hukkunTa.

⁶²Lantang bangngi kumbangung ero' mammuji ri Katte, lanri sikamma kaputusang adeletTa.

⁶³A'bela-bela' siagang sikontu tau mappilangngeria, sikontu tau anggaukangai parentaTa.

⁶⁴Rassi linoa siagang pangngamaseanTa, o, Batara, ajaria' sikamma katantuanTa.

⁶⁵Kirupaimi janjinTa, o, Batara, siagang baji'mi Kigaukang mae ri atanTa.

⁶⁶Kisarea' kacara'dekang siagang pangngassengang, saba' tappaka' ri sikamma parentaTa.

⁶⁷Ri tenanapa nihukkunga', ammengka sala', anne kamma anna'gala' jarre'ma' ri parentaTa.

⁶⁸Saba' ikatte bajikKi' siagang bajiki Kigaukanga, ajaria' ri sikamma katantuanTa.

⁶⁹Tau borroa napitina', mingka mannurukia' ri kaputusanTa sibatu pa'maikku.

⁷⁰Sikamma anjo taua tena napahangi, mingka untu' inakke anjo hukkunTa appakasannangi pa'mai'.

⁷¹Memang bajiki lanri Kihukkunga' sollanna kuasseng sikamma katantuanTa.

⁷²Untu' inakke tinggiangangi anggaranna hukkunTa kala sikontu bulaenga siagang peraka ri lino.

⁷³IKattemi ampa'jaria' siagang amparekka', Kisarea' pammahang untu' ampilajari sikamma parentaTa.

⁷⁴Tau mappilangngeria lasannangi pa'mai'na punna nacinikka', lanri manrannuanga' mae ri janjinTa.

⁷⁵Kuassengi angkanaya adeleki kaputusanTa, o, Batara, le'ba'ma' Kihukkung lanri tamamminraTa,

⁷⁶Poro pangngamaseanTa a'jari panynyaleoringku, situru' janjinTa mae ri atanTa.

⁷⁷Kikamaseanga', nakutuli attallasa', lanri hukkunTa napakasannangi pa'maikku.

⁷⁸Boli'mi kamma tau borroa a'jari siri'-siri' lanri le'baka' napitina, mingka lakunawa-nawai sikamma parentaTa.

⁷⁹Poro battui mae ri nakke tau mappilangngeria, sikontu tau angngassengai sikamma paratoranTa.

⁸⁰Poro tena nammengka pa'maikku battu ri katantuanTa, sollanna tena kunggappa siri'.

⁸¹Sanna' nakku'na pa'maikku mae ri kasalamakkang battua ri Katte; manrannuanga' ri janjinTa.

⁸²Mangngangi matangku antayangKi' anrupai janjinTa, kukana, “Angngapapi nalaKisaleoria'?”

⁸³Akkapurru'mi bukkulengku sanrapang pammoneang anggoro' toa, mingka tena nakukaluppai katantuanTa.

⁸⁴Sa'genna siapa sallona musti sa'bara' anne atanTa? Angngapapi nalaKihukkung tau angngondangia'?

⁸⁵Tau tenaya namannuruki ri hukkunTa, angngekemi kali'bong untu' antannangngia' sikko'.

⁸⁶Sikontu hukkunTa akkullei nirannuang, Kitulung laloa', saba' niondanga' natena passabakkanna.

⁸⁷Sike'de' mami nakkullemo ke'nanga ambunoa', mingka tena nakubalang parekangi parentaTa.

⁸⁸Kipasalamaka' lanri tuli mangngamaseanTa, sollanna akkulle kuturuki hukkunTa.

⁸⁹O, Batara, majarreki kananTa satunggu-tungguna, mannannungangi ri suruga.

⁹⁰TamamminraTa attahangi lalang sikontu jammang, Kipaentengi linoa sa'genna tulusu' nia'.

⁹¹Sikontu niaka anne kamma, niaki lanri parentaTa, saba' yangaseng ke'nanga ata-atanTa.

⁹²Ebara' angkana hukkunTa teai nakabattui karannuangku, mattantu le'ba'ma' mate lalang ri pa'risikku.

⁹³Tulusu' tena nalakubalang parekang parentaTa, saba' lanri iami nakitallassia'.

⁹⁴Kipasalama' laloa', saba' inakke anne iKatte ampatanga', le'ba'mi kuusahai mannuruki ri kaputusanTa.

⁹⁵Attayangi tau ja'dalaka ero' ambunoa', mingka erokka' amparhatikangi hukkunTa.

⁹⁶Kuciniki angkanaya tena apa-apa sukku' sangka'na, parentaTaji bawang sukku' baji'na.

⁹⁷Tamaka kungaina hukkunTa; kunawa-nawai sila'busu' allo.

⁹⁸Tuli mangngu'rangia' ri parentaTa, ampa'jaria' la'bi cara'dekangngang kala musu-musungku.

⁹⁹Pammahangku la'biangngangi napammahanna guru-gurungku, lanri inakke kunawa-nawai sikamma parentaTa.

¹⁰⁰La'bi pahanga' kala sikamma tutoa-toaya, saba' inakke kuta'galaki sikamma kaputusanTa.

¹⁰¹Kuliliangi sikamma panggaukang ja'dalaka, sollangku mannuruki ri ajaranTa.

¹⁰²Tena kubalang parekangi hukkunTa, saba' iKatte angngajarakka'.

¹⁰³Tamaka te'nena kana-kananTa, te'neangngangi naje'ne' bania!

¹⁰⁴Hukkung-hukkunTa nasarea' pangngassengang, sa'genna kukabirisi panggaukang jekkonga.

¹⁰⁵Kana-kananTa sanrapangi sulo ri jappaku, cahaya untu' ansingari oloangku.

¹⁰⁶Kupa'janjianga siagang sumpa lakurupai, untu' anna'gala' ri kaputusang adeletTa.

¹⁰⁷Tamaka pa'risikku, o, Batara, Kijagai laloi tallasakku situru' janjinTa.

¹⁰⁸Kitarimai pappala' doang sukkurukku, o, Batara, siagang Kiajarakka' hukkung-hukkunTa.

¹⁰⁹Tuli kubotori nyawaku, mingka tena nakukaluppai hukkunTa.

¹¹⁰Tau ja'dalaka natannangngia' sikko', mingka tena kummengka battu ri kaputusanTa.

¹¹¹ParentaTa iami pisakaku satunggu-tungguna, ampakarannui pa'maikku.

¹¹²Cinna' mannuruki ri katantuanTa sa'genna kala'busang tallasakku.

¹¹³Kungai hukkung-hukkunTa, kukabirisi tau tenaya namajarre' tojeng mae ri Katte.

¹¹⁴IKattemi mappatojengku siagang pa'la'langangku, manrannuanga' mae ri janjinTa.

¹¹⁵He tau ja'dalaka, bellako battu ri nakke! Erokka' mannuruki ri parentaNa Allata'alaku.

¹¹⁶Kipakajarreka' situru' janjinTa sollangku attallasa', teaKi' balang parekangia' nila'bai pa'maikku lalang ri panrannuangku.

¹¹⁷Kitumpakka' sollangku salama', na tuli kuparhatikang parentaTa.

¹¹⁸Kitollaki tau ammengkaya battu ri katantuanTa, sia-siaji bawang akkala' balle-ballena ke'nanga.

¹¹⁹Sikontu tau ja'dalaka Kipasinrapangi loro, lanri kammana nakungai sikamma paratoranTa.

¹²⁰Annekkerekka' lanri malla' ri Katte, annekkereki pa'maikku ri kaputusanTa.

¹²¹Kugaukammi adeleka siagang annabaya, tea' laloKi' passareangia' ri limanna balia.

¹²²A'janji maKi' angkana laKitulunga', teaKi' balang parekangia' nijallakkang ri tau tampoa.

¹²³Paccemi matangku antayangi bantuanTa appasalamaka, kutayangi pambebasang Kipa'janjianga.

¹²⁴Kigaukammi mae ri nakke apa situruka janjinTa siagang ajaria' katantuanTa.

¹²⁵Inakke atanTa, Kipipahangianga', sollanna kupahang parentaTa.

¹²⁶O, Batara, narapi'mi wattunTa angngalle tindakang, lanri nadakkai taua hukkunTa.

¹²⁷Kungai sikamma parentaTa la'biangngang na bulaeng, la'biangngang na bulaeng ti'noka.

¹²⁸Lanri kamma nakuttallasa'mo situru' sikontu pitunjutTa; panggaukang ammengkaya kukabirisi.

¹²⁹Tamaka malompona sikamma paratoranTa, jari kuturuki sibatu pa'maikku.

¹³⁰Punna nipakasingaraki, angngerangi singara' ajaranTa, assarei pangngassengang mae ri tau biasaya.

¹³¹Ta'rosa'-rosaki nappasakku, lanri nakkukku mae ri parentaTa.

¹³²Assaile maKi' mae ri nakke siagang Kikamaseanga', sangkamma Kikamaseanna tau mangngaia ri Katte.

¹³³Kipakajarreki dakkaku situru' janjinTa, teaKi' balang parekangia' nikoasai ri kaja'dallanga.

¹³⁴Kilappassanga' battu ri tau anjallakkangia', sollangku akkulle mannuruki ri paratoranTa.

¹³⁵Kibarakkakia' siagang kahaderanTa, siagang ajaria' katantuanTa.

¹³⁶Assolongi je'ne' matangku sanrapang binanga, lanri tenana nituruki hukkunTa.

¹³⁷IKatte adelekKi', o Batara, sikontu hukkunTa annaba sikali.

¹³⁸Sikamma parenta Kipassareanga adeleki nakkulle nirannuang.

¹³⁹A'barai kamma pepe' larroku lalang ri kalengku lanri nakaluppai musungku ajaranTa.

¹⁴⁰Majarreki janjinTa nakkulle nipatappa', sanna' kungaina.

¹⁴¹Inakke anne ca'dia' siagang tuna dudua', mingka tena nakubalang parekang ajaranTa.

¹⁴²KaadelanTa attahangi satunggu-tungguna, siagang tulusu' tojenna hukkunTa.

¹⁴³Nitujua' ri kasukkarrang siagang kasusaang, mingka katantuanTa ampakarannui pa'maikku.

¹⁴⁴Tuli adeleki paratoranTa; Kisare laloa' pangngassengang sollangku attallasa'.

¹⁴⁵Akkioka' mae ri Katte siagang sibatu pa'maikku; Kipiali laloa', o, Batara, erokka' mannuruki ri parentaTa.

¹⁴⁶Akkioka' ri Katte, Kipasalamaka', erokka' anna'gala' ri paratoranTa.

¹⁴⁷Ambangunga' bari'basa' na kuakkio' appala' tulung; manrannuanga' ri janjinTa.

¹⁴⁸Sila'busu' bangngia' tena kuttinro, untu' annawa-nawai ajaranTa.

¹⁴⁹Kipilangngeria' lanri pangngamaseanTa, o, Batara, Kijagai katallassangku lanri kaadelanTa.

¹⁵⁰A'reppese'mi tau angngondangia', ja'dalaki ateka'na ke'nanga siagang tena najampangi hukkunTa.

¹⁵¹Mingka iKatte a'reppesekKi', o, Batara, annabai sikontu parentaTa.

¹⁵²Battu rioloji nakuasseng battu ri ajarang-ajaranTa, angkanaya Kipattantui untu' satunggu-tungguna.

¹⁵³Kiciniki pa'risikku siagang Kipasalama' laloa', saba' tena nakubalang parekangi hukkunTa.

¹⁵⁴Kipattojenga' ri parkaraku siagang Kilappassanga'; pasalamaka' situru' janjinTa.

¹⁵⁵Tau ja'dalaka tena nalanipasalama', lanri tena namannuruki ri katantuanTa.

¹⁵⁶Tamaka lompona pangngamaseanTa, o, Batara, pasalamaka' situru' kaadelanTa.

¹⁵⁷Jai tau ammusua' siagang angngondanga', mingka tena nakubalang parekang paratoranTa.

¹⁵⁸Birisika' anciniki anjo sikamma tau ta'gilinga a'jari bali, lanri tena naturuki ajaranTa.

¹⁵⁹Kiciniki tamaka kungaina parentaTa, o, Batara, Kipasalamaka' lanri pangngamaseanTa.

¹⁶⁰Annabai sikontu kananTa, sikontu hukkunTa adeleki satunggu-tungguna.

¹⁶¹Sikamma ammarentaya naondanga' natena passabakkanna, mingka hukkunTaji bawang kukamallakkang.

¹⁶²JanjinTa ampakarannua', sanrapang tau ammuntuluka pa'barang-barangngang.

¹⁶³Sikontu balle-ballea kukabirisi, mingka hukkunTa kungai.

¹⁶⁴Tulusu' appala' sukkurukka' mae ri Katte, lanri hukkunTa adeleka.

¹⁶⁵Tau mangngaia ri hukkunTa amangi na sannang, tena akkulle anrompai ke'nanga.

¹⁶⁶Attayanga' kasalamakkang battu ri Katte, o, Batara, kugaukangi sikamma parentaTa.

¹⁶⁷Mannurukia' ri sikamma paratoranTa, sibatu pa'maikku mangngai ri ia.

¹⁶⁸Kuturuki parentaTa siagang pitunjutTa, saba' kiciniki sikontu panggaukangku.

¹⁶⁹Poro ta'rapiki mae ri Katte pakkiokku, o, Batara, Kisarea' pangngassengang, situru' janjinTa.

¹⁷⁰Boli'mi kamma ta'rapi' pappalakku mae ri Katte, Kipasalamaka' situru' janjinTa.

¹⁷¹Erokka' tuli mammuji mae ri Katte, saba' iKatte angngajarakka' katantuanTa.

¹⁷²Erokka' akkelong ri passala'na janjinTa, saba' sikontu parentaTa adeleki.

¹⁷³Poro tuli rella laloKi' antulunga', saba' kupilemi mannurukia ri paratoranTa.

¹⁷⁴Nakkuki pa'maikku mae ri kasalamakkang battua ri Katte, hukkunTa ampakarannui pa'maikku.

¹⁷⁵Boli'ma' kamma attallasa', sollanna kumammuji ri Katte, poro nitulunga' ri sikamma katantuanTa.

¹⁷⁶Sala oloanga' sanrapang gimbala' tappelaka, jari battu maKi', na Kiboya anne atanTa, saba' tena kubalang parekangi sikamma parentaTa.