Read Makassar Version – KITTA' MATANGKASA PAMMUJI 12 Bible Online

PAMMUJI 12 - Makassar Version – KITTA' MATANGKASA bible

PAMMUJI 12

¹Untu' pamimping pakelong. Situru' lagu makasagantuju. Pammujina Daud.

²Kitulungi ikambe o, Batara, nasaba' tenamo tau baji', sikamma tau majarreka ri Katte lanynya' ngasemmi.

³Para siballe-ballei ngasemmi ke'nanga, massing sitipumi siagang kana-kana te'ne.

⁴Kipammarimi anjo kana-kana manynyonyo'na ke'nanga, o, Batara, Kitongkoki bawana tu lompo bawaya

⁵angkanaya, “Makoasai ikambe siagang lilana ikambe! Manna apa akkulleji napau ikambe, na tena akkulle anrompai!”

⁶Nakana Batara, “Tau kasi-asia nijallakkangi na tau sessaya akkunrarengi. Jari battu memamMa' ri kamma-kammaya anne assarei kasannangngang naminasaia ke'nanga.”

⁷Majarreki janjinNa Batara siagang akkullei nirannuang, sanrapang pera' ci'nong niso'ri lalang pepe'.

⁸Tu ja'dalaka a'la'bangi a'lampa kemae-kemae, nipakalompoi kaja'dallanga ri inai-nai tau. Mingka iKatte a'la'langi ikambe, o, Batara, Kijagaimi ikambe battu ri sikamma anjo tu ja'dalaka.