Read Makassar Version – KITTA' MATANGKASA PAMMUJI 122 Bible Online

PAMMUJI 122 - Makassar Version – KITTA' MATANGKASA bible

PAMMUJI 122

¹Kelong siara battu ri Daud. Rannua' ri wattunna nakana taua mae ri nakke, “Umba kimange ri Balla'Na Batara!”

²Kamma-kamma anne battumi ikambe ri pakke'bu' lompona kota Yerusalem.

³Yerusalem nibangung a'jari kota bajiki nisusunna siagang ga'gai.

⁴Anrinnimi suku-suku bansaya battu, suku-suku bansa Napilea Batara, untu' appala' sukkuru' mae ri Ia situru' parentaNa.

⁵Anrinnimi sikamma karaeng turunganna Daud angngadeli ra'ya'na.

⁶Appala' doangko untu' kasalewanganna Yerusalem angkana, “Poro salewangangi sikontu tau mangngaia ri Katte.

⁷Poro nia' lalo passiamakkang lalang ri daeranu, na kasannangngang lalang ri tampa'-tampa' pattahangngannu.”

⁸Lanri sikontu bija pammanakangku siagang bela-belaku kukanamo, “Poro salewangangko!”

⁹Lanri Balla'Na Batara, Allata'alata, appala' doanga' sollannu mate'ne.