Read Makassar Version – KITTA' MATANGKASA PAMMUJI 138 Bible Online

PAMMUJI 138 - Makassar Version – KITTA' MATANGKASA bible

PAMMUJI 138

¹Battu ri Daud. O, Batara, erokka' appala' sukkuru' mae ri Katte, lalang sibatu pa'maikku. Ri dallekanna sikontu rewataya kukkelong lagu pammuji mae ri Katte.

²Su'juka' a'dalle' mae ri Balla' matangkasatTa nakupuji arenTa, saba' tamamminrayaKi' siagang tulusu' mangngamaseangKi'. La'bi Kiparalluangangi janjinTa kala panggappa pikkiranna taua mae ri Katte.

³Wattungku akkio' mae ri Katte, appialiKi', Kipakajarreki pa'maikku sa'gengku a'jari barani.

⁴Sikontu karaenga ri lino lamammuji ri Katte, o, Batara, saba' nalangngere'mi ke'nanga janjinTa.

⁵Lakkelongi ke'nanga ri passala'na panggaukanTa siagang ri passala' kalompoanTa.

⁶Tamaka la'biritTa, mingka tau tunaya Kiparhatikang tongi; tau borroa takkulleai accokko battu ri Katte.

⁷Wattungku nituju ri kasusaang, Kipartahangkangi tallasakku. Kiewai musungku sitabanga a'jallo' nampa Kipasalamaka' siagang koasaTa.

⁸IKatte lanrupai janjinTa mae ri nakke; teaKi' ammari angngalle tindakang untu' ummatTa.