Read Makassar Version – KITTA' MATANGKASA PAMMUJI 139 Bible Online

PAMMUJI 139 - Makassar Version – KITTA' MATANGKASA bible

PAMMUJI 139

¹Untu' pamimping pakelong. Pammuji battu ri Daud. O, Batara, iKatte antarrusia' siagang angngassenga'.

²IKatte angngassengi sikontu panggaukangku; battu bellaKi' naKipahang pikkirangku.

³IKatte ancinikka', baji' ri wattungku anjama yareka wattungku ammari-mari, iKatte angngassengi sikontu apa kugaukanga.

⁴Ba'lalo ri tenanapa ku'bicara, Kiasseng la'bi rioloi apa lakupaua.

⁵IKatte angkulilingia' battu ri kere-keremae, siagang Kila'langia' lalang koasaTa.

⁶Tamaka lantanna mae ri nakke anjo pangngassenganTa, tanirapikai ri pikkirangku.

⁷Kemae lakkulle kulampai nakukkulle ta'lappasa' battu ri kakoasanTa? Kemaea' lakkulle lari ampakabellai kalengku battu ri dallekanTa?

⁸Punna naikka' ri langika, niakKi' anjoreng, punna attinroa' ri lino kamateanga, nia' tongki' anjoreng.

⁹Punna anri'bakka' allalo ri bangkeng langi' iraya yareka ammantang ri cappa' lau' kaminang bellaya,

¹⁰manna anjoreng nia' tongKi' antulunga'; anjoreng limanTa todong anrenrenga'.

¹¹Punna kupala' sollangku nikalimbuki ri sassang, na'jari bangngi singara' niaka ri tammuliliku,

¹²anjo kasassangnganga tena todong nasassang mae ri Katte; anjo bangngia singaraki sangkamma ri alloa, na anjo sassanga sangkammai singara'.

¹³Kipa'jari sikamma bageang-bageang niaka ri tubuku, na Kiparekka' lalang ri pammanakkanna ammakku.

¹⁴Mammujia' ri Katte saba' inakke teai sipato' hebakku! Sikontu gautTa appakalannasaki siagang tamaka lompona, sanna' kupahang tojenna anjo sikammaya.

¹⁵Wattunna Kipa'jari buku-bukungku, Kiatoro' bajiki lalang ri pammanakkanna ammakku, nampa abakkaka' anjoreng lalang rahasia, na tena kutaccokko mae ri Katte.

¹⁶Kicinikka' ri wattungku lalang ija ri battang; yangasenna Kicataki lalang ri kittatTa; Kipattantumi allo-allo lanadallekanga ri tenanapa manna se're nipakaramulai.

¹⁷Tamaka sukkara'na nipahang pikkiranTa mae ri nakke, o, Allata'ala, siagang tamaka jaina lanirekeng!

¹⁸Punna kurekeng, jaiangngangi na kassika; punna ambangunga', tuli iKatte kunawa-nawa.

¹⁹Poro kitumpasa' lalo tau ja'dalaka, o, Allata'ala, Kipakabellai battu ri nakke tau appasolonga cera'!

²⁰Nacarita ja'dalakKi' ke'nanga, siagang assumpa nipare'-pareki ke'nanga lanri kota-kotaTa.

²¹O, Batara, kukabirisi tau birisika mae ri Katte, lussaki pa'maikku mae ri tau angngewaya mae ri Katte!

²²Sanna' kukabirissinna ke'nanga, siagang kupare' musui ke'nanga.

²³Kisalidikia' o, Allata'ala, kitarrusi pa'maikku, so'ria siagang Kiassemmi pikkirangku.

²⁴Kicinikimi gassingka nia' kaja'dallang lalang ri kalengku, siagang kirenrenga' mae ri oloang mannannunganga.