Read Makassar Version – KITTA' MATANGKASA PAMMUJI 140 Bible Online

PAMMUJI 140 - Makassar Version – KITTA' MATANGKASA bible

PAMMUJI 140

¹Untu' pamimping pakelong. Pammuji battu ri Daud.

²Kilappassanga' battu ri tau ja'dalaka, o, Batara, Kijagaia' battu ri tau anggaukangai katerassanga.

³Narancanakangi ke'nanga kaja'dallanga lalang ri pa'mai'na, siagang allo-allona appa'nia' pa'beserang.

⁴ Lilana ke'nanga sanrapangi ulara' nia' racunna, kana-kananna ke'nanga sanrapangi racunna ulara' le'lenga.

⁵O, Batara, Kijagaia' battu ri koasana tau ja'dalaka, jagaia' battu ri tau anggaukangai katerassanga eroka antu'guranga'.

⁶Sanna' tampona ke'nanga a'mere'-mereki antannangngia' sikko', napalaparaki sikkoka untu' anjakkalaka'. Ri siapa la'buna aganga natannang ke'nanga sikkoka untu' anjakkalaka'.

⁷O, Batara, kukana: IKattemi Allata'ala, Kiparhatikanga' lalang pappala' doangku.

⁸O, Batara, Allata'alaku, mappasalamakku magassinga, le'ba'ma' Kijagai lalang pa'bundukang.

⁹TeaKi' turukiangi ero'na tau ja'dalaka, o, Batara, teaKi' lappassangi anjari rancanana ke'nanga.

¹⁰TeaKi' lappassangi musungku ammeta; boli'mi kamma kana-kana ja'dala' napau ke'nanga iaminjo antujui kalenna ke'nanga ampitinaya'.

¹¹Boli'mi kamma nipibosi ke'nanga ri bara pepe', nampa nipela' antama' ri kali'bong kamateanga, sa'genna takkullea assulu' poleang.

¹²Boli'mi kamma nituju ri bala lompo tau anggaukangai katerassanga, teaKi' lappassangi ammantang ri lino tau nangaia appitina.

¹³Kuassengi angkana iKatte assarei kaadelang tau nijallakkanga, siagang ampattojengi parkarana tu kasi-asia.

¹⁴Tau lambusuka lamammuji mae ri Katte; lammantangi ke'nanga siagang iKatte.