Read Makassar Version – KITTA' MATANGKASA PAMMUJI 143 Bible Online

PAMMUJI 143 - Makassar Version – KITTA' MATANGKASA bible

PAMMUJI 143

¹Pammuji battu ri Daud. O, Batara, Kipilangngeri pappala' doangku, Kiparhatikangi pappalakku. Kipialia' lanri tamamminraTa, Kiturukianga' pappala' doangku lanri kaadelanTa.

² Inakke anne atanTa, teaKi' adelia', saba' taniakka tau tania' salana ri dallekanTa.

³Naondamma' musungku siagang nabetama', nampa napantamaka' ri tarungku sassanga; a'jarima' sanrapang tau salloamo mate.

⁴Tappu'mi sumangakku, sanna' linguna pa'maikku.

⁵Kuu'rangi allo-allo allaloa; kunawa-nawai sikontu panggaukanTa, kupikki'-pikkiri' sikamma bate paretTa.

⁶Kupatara limangku appala' doang mae ri Katte; sanrapang butta kalotoro', nakkuki nyawaku mae ri Katte.

⁷Kipialia' linta', o, Batara, saba' tappu' minasama'. TeaKi' accokkoi battu ri nakke, sollanna tena nakusangkamma tau naungamo ri lino kamateanga.

⁸Punna bari'basa', Kipiu'rangianga' pangngamaseanTa, saba' ri Kattemi panrannuangku. Kipicinikianga' oloang mustia kuolo, saba' ri Kattema' appala' doang.

⁹Battua' ero' a'la'lang mae ri Katte, o, Batara, Kilappassanga' battu ri musu-musungku.

¹⁰Ajaria' anggaukangi erotTa, saba' iKattemi Allata'alaku. IKatte baji' pa'mai' lanrenrenga' mange ri oloang lapparaka.

¹¹Kipasalamaka' situru' janjinTa, o, Batara, lanri kabajikanTa, Kilappassanga' battu ri kasukkarranga.

¹²Lanri pangngamaseanTa Kitumpasaki sikontu musungku, kiancuruki sikontu tau anjallakkangia', saba' inakke atanTa'.