Read Makassar Version – KITTA' MATANGKASA PAMMUJI 144 Bible Online

PAMMUJI 144 - Makassar Version – KITTA' MATANGKASA bible

PAMMUJI 144

¹Battu ri Daud. Pujimi Batara pa'la'langangku! Ia angngajaraka' a'bundu', siagang allatia' assiba'ji.

²Ia antulunga' siagang angngalleanga', ampasalamaka' siagang tampa' pa'la'langangku. Ia pa'la'langangku, tampa' palariangku, napantuduki bansa-bansaya mae ri nakke.

³ O, Batara, apa todong anjo rupataua naKiparhatikangi? Inaika ia sa'genna Kijampangi?

⁴Anjo rupataua sanrapanji anging mammiri', sanrapang bayang-bayang allaloa, kammaminjo tallasa'na.

⁵O, Batara, Kisungkei langitTa siagang naung maKi', Kisentoki moncong-monconga sollanna a'rumbu.

⁶Kipasambilai kilatTa sollanna tassimbung-simbung musua, Kipabuccuki ana' panaTa sollanna gegere' ke'nanga.

⁷Kipajonjoi limanTa battu ri suruga, na Kilappassanga' battu ri a'baya. Kipasalamaka' battu ri kakoasanna bansa maraenga

⁸nangaia a'balle-balle siagang annipu siagang appare' sumpa nipare'-pare'.

⁹Lakkelonga' kelong beru mae ri Katte, o, Allata'ala, kuko'bi' kacapia nampa akkelonga'.

¹⁰Kisarei pammetang sikamma karaenga, siagang Kilappassang atanTa Daud.

¹¹Kilappassanga' battu ri pa'danna tau pallaka; Kipasalamaka' battu ri kakoasanNa bansa maraenga nangaia a'balle-balle siagang annipu, siagang appare' sumpa nipare'-pare'.

¹²Tapporo ana'-ana' bura'neta ri wattu rungkana sanrapangi lamung-lamung a'bakka' lompo. Tapporo ana'-ana' baineta sanrapang benteng ga'ga, ambelo-beloi sikontu benteng balla' lompoa.

¹³Poro rassi ngaseng bonena sikontu gudanta rassi siagang sangka' rupa wassele' butta. Poro sikamma gimbalatta ri paranga a'bija sa'genna appulo sa'bu jaina.

¹⁴Poro sikamma sapita pila' katambangi natena tappela' yareka mate ammana'. Poro tena kalangngerang sa'ra tau pa'risi' ri sikamma oloanga ri kotata.

¹⁵Mate'nei bansa kammaya anjo, Mate'nei umma' Allata'alaya Batarana!