Read Makassar Version – KITTA' MATANGKASA PAMMUJI 145 Bible Online

PAMMUJI 145 - Makassar Version – KITTA' MATANGKASA bible

PAMMUJI 145

¹Pammuji battu ri Daud. Erokka' ampakalompoKi', o, Allata'ala siagang Karaengku, siagang mammuji mae ri Katte satunggu-tungguna.

²Allo-alloku ero' appala' sukkuru' mae ri Katte, siagang kupakala'birikKi' satunggu-tungguna.

³Saba' malompoi Batara siagang sanna' nipujiNa takkulleai nitarrusu' kalompoanNa.

⁴Sikontu turungang lamammuji taua ri panggaukanTa siagang nakabarrang kaporeanTa.

⁵Lanabirittakangi kalompoanTa siagang kala'biranTa, bate pare' malompoTa lakunawa-nawai.

⁶Nakabarrangi ke'nanga sikamma panggaukang hebatTa, lakupappiassengangi kalompoanTa.

⁷Lanacaritai taua sikontu kabajikanTa siagang akkelong ri passala' kaadelanTa.

⁸Anjo Batara mangngamaseangi siagang mangngarimangngi, tena nalinta' larro siagang tuli mangngamaseangi.

⁹Lammoro' pa'maiki mae ri sikontu taua, siagang Nakamaseang sikontu apa Napa'jaria.

¹⁰Sikontu bate paretTa mammuji mae ri Katte, o, Batara, sikontu ummatTa lappala' sukkuruki mae ri Katte.

¹¹Lanapakalompoi kakoasanTa a'jari Karaeng, siagang nacarita kaporeanTa,

¹²sollanna naasseng sikontu taua panggaukang lompoTa, kammayatompa kakaraengang mala'biritTa siagang accayaya.

¹³PamarentahanTa tulusuki sa'genna satunggu-tungguna, kakoasanTa attahangi sikontu turungang. Tamamminrayai Batara ri sikontu janjinNa, rassi pangngamaseang sikontu panggaukanNa.

¹⁴Natulungi Batara tau lalanga ri kasusaanga, Napaentengi tau ta'dundua.

¹⁵Sikontu apa apa attallasaka manrannuangi ri Katte; Kisarei ke'nanga kanre punna narapi' wattunna.

¹⁶Kipa'nia' ngasengi sikontu nakaparalluanga ke'nanga, sa'genna tena nakakurangang ke'nanga.

¹⁷Adeleki Batara lalang sikontu tindakanNa siagang rassi pangngamaseang lalang sikontu panggaukanNa.

¹⁸A'reppeseki mae ri tau akkioka mae ri Ia, siagang appalaka mae ri Ia siagang tulusu' pa'mai'na.

¹⁹Napakasannangi pa'mai'na sikamma tau mappilangngeria; Napilangngeri pakkio'na siagang Napasalamaki ke'nanga.

²⁰Najagai sikontu tau mangngaia mae ri Ia, mingka tau ja'dalaka napossoki.

²¹Erokka' tuli mammuji mae ri Batara, poro sikontu apa nipa'jaria napuji arenNa Batara sa'genna satunggu-tungguna.