Read Makassar Version – KITTA' MATANGKASA PAMMUJI 146 Bible Online

PAMMUJI 146 - Makassar Version – KITTA' MATANGKASA bible

PAMMUJI 146

¹Pujimi Batara! He nyawaku, pujimi Batara!

²Erokka' mammuji ri Batara lalang tallasakku siagang makkelong ri Allata'ala lalang niakku ija.

³Teako manrannuangngi mae ri tukoasaya, ri rupatau takkullea appasalama'.

⁴Punna mate ke'nanga, ammotereki ke'nanga mae ri buttaya; anjo memang alloa nalanynya' ngasemmo rancanana ke'nanga.

⁵Mate'nei tau manrannuanga ri Karaeng Allata'alana, ampatangai Allata'alana Yakub a'jari pannulunna.

⁶ Iami ampa'jari langika siagang linoa, tamparanga siagang sikontu bonena; Ia tamamminraya satunggu-tungguna.

⁷Naalleangangi ha'na sikamma tau nijallakkanga, na Nasare kanre tau cipuruka. Batara allappassangi sikamma tunitahanga,

⁸siagang ampa'jari tau butaya akkulle accini'. Napabangungi tau tu'guruka, siagang Nakamaseangi tau lambusuka.

⁹Najagai tau battu-battua; Natulungi sikamma jandaya siagang ana' kukanga, mingka napassalasai rancanana tau ja'dalaka.

¹⁰Anjo Batara Karaeng satunggu-tungguna. He Sion, Allata'alanu makoasa lalang sikontua jammang. Pujimi Batara!