Read Makassar Version – KITTA' MATANGKASA PAMMUJI 147 Bible Online

PAMMUJI 147 - Makassar Version – KITTA' MATANGKASA bible

PAMMUJI 147

¹Pujimi Batara! Saba' bajiki ammujia mae ri Ia, siagang sannangi pa'maika akkelonga mammuji mae ri Ia!

²LaNapammollei Batara Yerusalem; laNapoterangi sikamma tau nipelaka.

³Napammollei tau la'baya pa'mai'na, siagang Naballei loko'na ke'nanga.

⁴Napattantui jaina bintoenga ri langi', siagang massing Nasarei areng.

⁵Tamaka lompona siagang heba'Na Batarata, kacara'dekanNa tenanjorenganna.

⁶Napabangungi tau nijallakkanga, mingka tau ja'dalaka Napatappasaki naung ri buttaya.

⁷Kelongangi pammuji-mujia mae ri Batara, ko'biki kacapia mae ri Allata'alata.

⁸Iami ampaka'rangi rammanga' ri langi'; Ia ampasadiai bosia mae ri buttaya, siagang ampatimboi rukuka ri buluka.

⁹Nasarei kanre olo'-oloka, siagang ana' jangang-jangang akkio'-kioka.

¹⁰Nangaia Batara teai jarang kassaka; teai todong pejuang barania.

¹¹Ia Nangaia Batara iamintu tau mappilangngeria, tau tuli manrannuanga ri pangngamaseanNa.

¹²Pujimi Batara, he Yerusalem! Pujimi Allata'alanu, he Sion!

¹³Saba' Ia ampakajarreki sikamma pakke'bu' lomponu, Ia ambarakkaki pandudu'nu.

¹⁴Ia anjagai daeranu sollanna tuli amang, ampakabassorokko siagang gandung kaminang bajika.

¹⁵Ia assare parenta mae ri buttaya, na nigaukammo linta' kananNa.

¹⁶Ia ampaturungi bosi eska sanrapang kapasa', ampakioroki saliuka sanrapang limbu'bu'.

¹⁷Ia ampaturungi bosi eska sanrapang batu-batu ca'di; tena akkulle attahang andallekangi dinginna.

¹⁸Nampa lanri parentaNa nassolong anjo eska; napammiriki anginga, nampa a'lo'loro'mo je'neka.

¹⁹Napabattui pasanNa mae ri umma'Na, katantuanNa siagang hukkunNa mae ri umma' nipileNa.

²⁰Tena Nagaukangi kammaya mae ri bansa-bansa maraenga, tena naassengi ke'nanga hukkung-hukkunNa. Pujimi Batara!