Read Makassar Version – KITTA' MATANGKASA PAMMUJI 148 Bible Online

PAMMUJI 148 - Makassar Version – KITTA' MATANGKASA bible

PAMMUJI 148

¹Pujimi Batara! Pujimi Batara, he sikontu bonena suruga! Sikontu ammantanga ri tampa' tinggia, pujimi!

²Pujimi, he sikontu malaeka'Na, pujimi, he sikontu tantarana suruga!

³Pujimi, he mataallo siagang bulanga, pujimi, he sikamma bintoeng accillaka!

⁴Pujimi, he langi' kaminang tinggia, pujimi, he je'ne' irate langika!

⁵Bajiki punna mammuji ngaseng ke'nanga ri arenNa Batara, saba' yangasenna nipa'jari lanri parentaNa.

⁶Ia ampattantui massing-massing tampa'na, a'jari katantuanna satunggu-tungguna.

⁷Pujimi Batara, he sikontu bonena lino, he, naga-naga tamparang siagang sikontu tamparang lompoa;

⁸he kila' siagang bosi eska siagang rammanga, anging kancang mannurukia ri parentaNa Batara!

⁹Pujimi, he bulu'-buluka siagang moncong-monconga, poko'-poko' a'rappoa siagang sikontu romanga;

¹⁰sikontu olo'-olo' niparakaia siagang olo'-olo' liaraka, sikontu olo'-olo' a'loloka ri butta siagang jangang-janganga!

¹¹Pujimi, he sikamma karaenga siagang sikontu bansa, sikamma bija karaenga siagang sikontu pamarentaya;

¹²sikontu turungkaya siagang tuloloa, tau toaya siagang tau rungkaya.

¹³Bajiki mammuji ngaseng ke'nanga ri arenNa Batara, saba' arenNa la'bi lompoangngangi na sikontu arenga; kalompoanNa la'biangngangi na langika siagang linoa.

¹⁴Le'ba'mi Napakajarre' bansana, sa'genna nipuji-pujimo ri umma'Na, Israel, umma' nasayanNa. Pujimi Batara!