Read Makassar Version – KITTA' MATANGKASA PAMMUJI 16 Bible Online

PAMMUJI 16 - Makassar Version – KITTA' MATANGKASA bible

PAMMUJI 16

¹Pammujina Daud. Jagaia', o, Allata'ala, saba' iKattemi kupa'la'langi.

²Kukana, “IKattemi Bataraku, kate'neangku, tenamo la'biangngang naiKatte!”

³Kupakalompoi sikamma tu matangkasaka ri anne pa'rasanganga; pangngaingku iamintu ammantanga siagang ke'nanga.

⁴Boli'mi kamma tu anynyombaya ri rewata-rewata pila' katambang si'nana. Taeroka' assare koro'bang mae ri rewata-rewataya, ba'lalo taeroka' ampaui arenna ke'nanga.

⁵O, Batara, iKatteji bawang Bataraku; Kisarea' sikontu apa kuparalluanga, sarengku niaki lalang limanTa.

⁶Teai sipato' ga'gana passareTa mae ri nakke, sanna' napakasannanna pa'maikku!

⁷Mammujia' ri Batara, Ia ampakaingaka'; manna ri wattu bangngina nipasailea' ri sa'ranna pa'maikku.

⁸ Tuli mangngu'rangia' ri Batara; niaki ri sa'ringku, Iami saba' natena kuta'lengga.

⁹Lanri kammanami narannu pa'maikku siagang ma'reja-reja nyawaku, na sannang mammari-mari poso batangkalengku.

¹⁰ Saba' tena Kilappassanga' mate; taKilappassangai posso' tu Kikamaseanga.

¹¹Kipicinikianga' oloang mangea ri katallassanga; battu ri Kattema' anggappa karannuang alla'bi-la'bi siagang mate'ne sa'genna satunggu-tungguna.